Potty training vir dommies

by Blogger - Charme Kriel / Jan 03, 2017 / 0 Kommentaar / Gelees deur 107 mense.

Ek het lankal beplan dat hierdie vakansie die een gaan wees vir potty training. Dis somer en lekker warm so glipsbroekies raak sommer gou droog en Lisa kan heeldag sommer kaalgat ook rondloop as sy wil. Ek het my leeswerk gedoen en ek was gewapen met sterretjies, 'n sticker chart, 'n potjie en so toiletseat-dingetjie wat jy op die toilet sit. Ek was REG!

Nes alles anders in hierdie warrelwind wat hulle “ouerskap” noem, was ek toe nou nie so “reg” nie. Ek weet eintlik glad nie hoekom ek enigsins nog oplees oor goed nie, want my kind pas nou maar net nie in die boekmold nie.

Dag 1 was wonderlik. Sy het dit vreeslik geniet om 'n pantie te dra en het hande geklap vir elke toiletpiepie. Dag 2 weier sy om die pantie aan te trek. Dag 3 sweer sy die toilet gaan haar opeet. Okkidokes… so die 3 dag potty train metode gaan duidelik nie vir ons werk nie.

Dag 4 is sy weer op die toilet. Mooi… back on track. Dag 5 het ons nie een glipsie gehad nie en pappa het huis toe gekom. Dag 6 gaan kuier ons by ouma en ons hou mooi aan.

Na 'n week het ek dit goed gedink om haar nou sonder 'n doek uit te vat. In die mall het sy mooi op die toilet gesit en nie een glipsie gehad nie. Op pad huis toe besluit ons om gou nog een stop te maak en'n lig te koop. Dis een van daai groot winkels met ligte orals en met 'n mooi suede bank en matte.

Ek en manlief wik en weeg tussen 2 ligte en ooo wee… daar staan Lisa met haar bene oop en begin piepie! Ek het my man nog nooit so vinnig sien reageer nie. Hy het haar opgeraap en is met haar toilet toe. Ek het my handsak op die  nat kol op die mat gesit en gemaak asof als onder beheer is. Nadat ek goed rondgekyk het dat niemand kyk nie het ek my “skoen vasgemaak” en vinnig met wetwipes probeer red wat te redde was.

My man het teruggekom met 'n nat pantie in sy broeksak en ons het toe maar die duurder lig gekoop (net om op te maak vir die kol op die mat).

In die kar kon ons ons lag nie meer hou nie. Tussen die histerie van die oomblik het ek gewonder hoeveel kolle daar al op daai mat lê en hoeveel ligte hulle nie al as gevolg hiervan verkoop het nie.

Ons is amper daar met die potty training storie, maar een ding is seker… ons ganglig is nie net 'n ganglig nie. Dis 'n lig met 'n storie. 'n Storie van menswees en glipsies 'n Storie van ons reis hier op aarde. En as ek nou daardie lig aansit, sit ek hom nie net aan nie, maar ek glimlag breed en onthou hoe kosbaar 'n glipsie kan wees.

 

  • Blogger - Charme Kriel

    Ek is 'n doodgewone, plat op die aarde, kaalvoetmamma van 'n wonderwerk babatjie wat op 28 weke gebore is. Haar storie het my inspireer om te begin blog en nou kan ek nie ophou nie. Lees meer oor haar by www.lisa28weekliefie.com.
    Ek  is 'n voltydse onderwyser, ma en vrou en 'n deeltydse blogger en fotograaf. Ek bly in Simonstad,  is passievol oor Afrikaans en is mal daaroor om in my hartstaal te kan skryf.

kommentaar (0)

Lewer Kommentaar

To prevent automated spam submissions leave this field empty.
CAPTCHA
Hierdie vraag is om te toets of jy ’n persoon is om outomatiese "spam" inskrywings te voorkom.
Image CAPTCHA