Getroud wees verg harde werk

huwelik

Die huwelik is die wonderlikste verhouding waarin jy kan wees. Hoe maak jy seker dat dit nie ʼn ontnugtering is nie?

Vriende en familie moedig jou in jou alleenloperdae aan om te trou, tot die dag waarop jy die knoop vasmaak. Skielik word elke goeie wens gevolg deur ’n waarskuwing: “Onthou, trou is nie perdekoop nie!” Dan begin jy wonder waarvoor jy jou ingelaat het.

Omdat baie mense teleurgesteld is met hulle eie huwelik, voel hulle dis hulle plig om ander te waarsku. ’n Mens moet die huwelik oopkop en met realistiese verwagtings binnegaan, maar moenie dat ander jou pret bederf nie.

“Elke mens en elke verhouding is anders,” sê Philip du Toit, ’n huweliks- en gesinsberader. “En jou verwagtings oor die huwelik sal afhang van jou eie volwassenheid, aanvaarding van jouself en jou verwysingsraamwerk,” verduidelik hy.

Jy gaan nie noodwendig vandag dieselfde voel as môre nie. “Jy dink anders oor die lewe op dertig as op veertig en ontdek en aanvaar mettertyd dinge van jouself. Hoe veilig jy in jou huwelik voel, sal bepaal hoe gemaklik jy is om verrassings of skokke met jou maat te deel.”

Aanvaar dat elkeen anders is en respekteer jul verskille

Pas na die troue het jy agtergekom dat hy eenvoudig net beter is met sekere goed as jy. Hy is dalk minder emosioneel as jy, fisies sterker en het meer perspektief op die lewe. Moenie vies word vir jouself óf vir hom nie. Die een is nie beter as die ander een nie – net anders. Maak vrede met jouself en met jou man.

Beskou dit as ’n avontuur om mekaar se sterk en swak punte te ontdek en probeer mekaar aanvul. Eerder as om bedreig te voel deur die verskille, moet julle kragte saamsnoer en as ’n gedugte span werk.

Julle moet julle onderskeie eilandjies verlaat en saam ’n nuwe, beter eiland vorm. Bou konstruktief saam aan ’n nuwe verbeterde “ons”, wat op respek en vertroue gegrond is.

Wees oop en deel julle harte eerlik met mekaar

In ’n wêreld waar ware commitment skaars is, behoort die huwelik die één verhouding te wees waarin ware vertroue moontlik is. Binne hierdie veilige ruimte behoort ons mekaar te kan wys wat dit beteken om menslik te wees. Die troubelofte van “ek sal jou nie verlaat nie” behoort die wonderlikste sekuriteit te skep.

Dis nie altyd maklik nie, veral as dit kom by jou eie vrese, kwesbaarhede en swakhede. Hierdie verhouding dwing jou om aan te hou groei. Waar anders kry iemand die kans om elke beweging en woord van jou so fyn dop te hou? (En steeds lief te wees vir jou?)

Sit ten minste een vaste uur per week opsy waarin julle veilig voel om julle hartsgeheime met mekaar te deel. Wees geduldig met mekaar – veral mans sukkel nogal hiermee. Probeer om vir ’n slag nie te praat oor dinge soos ’n stukkende kraan of die kinders nie!

Julle moenie net praat nie, maar kommunikeer

As jy gedurig moet raai wat aan die gang is, beteken dit julle kommunikeer swak. Volgens die sielkundige, dr. Robyn Smith, is “waarheid” die geheime bestanddeel van ’n gelukkige huwelik. Waarheid is om te ontdek en te erken wie jy is, en wat jy uit die lewe en verhoudings wil hê.

Daarsonder word die verhouding gekenmerk deur onuitgespreekte behoeftes, vrae wat nooit gevra word nie, onrealistiese verwagtings en verskuilde agendas. Hierdie dinge sal gevoelens van magteloosheid en hopeloosheid in ’n huwelik veroorsaak.

Vir finansiële raad of mediese probleme gaan sien ons die beste kundiges wat geld kan koop. Hoekom doen jy dit nie ook vir jou huwelik nie? Kom uit die groef en neem ’n proaktiewe besluit om julle saamwees opwindend te hou.

Vir die gelukkig getroudes is die huwelik ’n fantastiese ontdekkingsreis. Dit is lekker en veilig in hierdie verhouding en dis ’n uitdaging om dit so te hou.

 

 

kommentaar (0)

Lewer Kommentaar

To prevent automated spam submissions leave this field empty.
CAPTCHA
Hierdie vraag is om te toets of jy ’n persoon is om outomatiese "spam" inskrywings te voorkom.
Image CAPTCHA