Maak gesonde keuses en verloor gewig

89

Daar is min twyfel oor die belangrikheid van gesonde en gebalanseerde eetgewoontes vir algemene fisieke gesondheid. Dit beïnvloed immers ook jou geestelike welstand.

Die regte dieet begin met jou inkopielys

Moenie kos met min voedingswaarde en wat hoog in vet is, koop nie. Kies byvoorbeeld vars helderkleurige groente en vrugte. Kyk altyd na die etikette. Vermy produkte wat hoog in vet (hoër as 10% per 100 g) en laag in vitamiene en minerale is.

Jy kan steeds jou gunstelingkos geniet. Doen dit byvoorbeeld net een maal per maand, of deel dit met iemand. Wees altyd op die uitkyk vir gesonde variasies soos wortelkoek of volgraanmuffins. Kies, waar moontlik, groente en vrugte byvoorbeeld in die vorm van sosaties of groentestokkies, saam met ’n laekilojoule-doopsous. Onthou, vet maak vet!

Kies gesonde vette soos olywe, avokadopeer, grondboontjiebotter, neute, olyf- of kanola-olie.

Hou altyd porsiegrootte in gedagte. Moet nooit jou bord oorlaai nie. Eet eerder meer gereeld kleiner etes om hongerpyne te stil. Eet veral met aandetes kleiner porsies stysel en vleis, en kos met ’n lae kilojoulewaarde.

Minder kos beteken nie noodwendig gewigsverlies nie, maar wel groter hoeveelhede laekilojoule gesonde kos.

Plantproteïen is ’n gesonde keuse vir gewigsverlies

Die sleutel tot permanente gewigsverlies is ’n gevoel van versadiging met ’n groter volume voedsel. Dit moet laag in kilojoules wees, soos groente en vrugte. Drink ten minste twee liter water per dag.

As jy tussenin honger word, eet laekilojoule rou groente en vrugte soos aspersies, wortels, sampioene (nie gebraai nie), selderystokkies of aarbeie. Hou ’n bak met vars vrugte beskikbaar.

Eet ontbyt altyd so vroeg as moontlik sodat die ander etes beter deur die dag versprei word. Dit kan ook tot groter gewigsverlies bydra.

Moenie vergeet van plantproteïen soos dröebone, dröe-ertjies, lensies of sojaprodukte nie, soos Imana en Fry’s. Quorn is byvoorbeeld ook ’n baie lekker plantproteïen. Fry’s en Quorn kom in verskeie vorms voor soos schnitzels en roerbraai.

Hierdie voedselsoort het baie voordele. Dit is hoog in vesel en laag in vet. Dit bevat gesonde vette, soos omega 3. Dit is goedkoper as diereproteïene, laag in cholesterol en sout, en bevat verskeie belangrike vitamiene en minerale.

Laat die hele gesin help om kos te maak

Deeglike beplanning is noodsaaklik – daagliks, weekliks en selfs maandeliks. Werkende moeders vind dit moeilik om laatmiddag by die huis te kom en dan te moet begin kosmaak. Beplan daarom vooruit.

Pak die vorige aand ’n kosblik vir werk. Met deeglike beplanning kan kos binne 30 minute of op die langste, ’n uur, gereed wees. Betrek die hele gesin, ook die mans, by die kosmaak.

’n Gesonde leefstyl sluit ook altyd matige oefeninge in, ten minste 30 tot 60 minute per dag, drie keer per week. Begin stadig, net 15 minute per dag en verleng dit soos wat jou fiksheid toeneem.

As jy gewig wil verloor, moet jy ses dae per week vir 45 tot 60 minute per dag oefen. Aan die begin voel dit moeilik om dié tipe leefstyl aan te leer, maar ’n mens raak gou gewoond daaraan. Dit word makliker.

’n Kans kom maar een maal. Maak die beste gebruik van elke oomblik. Gebruik die geleentheid wat God jou bied – nou! Wees dankbaar, leef gesond en geniet die lewe!

– AN DU PLESSIS, huishoudkundige en dieetkundige