Bepaal gene my gesondheid?

146
genetiese navorsing

Genetiese navorsing skep moontlikhede om jou vatbaarheid vir siektes te identifiseer en jou reaksie op medikasie te voorspel.

Asma, hoë bloeddruk en hoë cholesterol is oorerflike siektes wat in families kan voorkom. DNS-toetse kan deesdae die risiko vir ’n groot verskeidenheid van dié toestande identifiseer.

Genetiese navorsing kan hart- en bloedvatsiektes, sekere tipes kanker en oorerflike siektes, of die risiko om dit te ontwikkel, diagnoseer, selfs voordat enige simptome sigbaar word.

Indien jy ’n naby familielid met borskanker het, kan genetiese toetsing bepaal of die kanker te wyte is aan ’n geërfde afwyking. ’n Mutasie in die BRCA1- of 2-geen verhoog die risiko om borskanker te ontwikkel tot 70%. Indien daar so ’n moontlikheid bestaan, sal jou dokter ’n plan voorstel wat dieet, medikasie en leefstylaanpassings mag insluit.

Farmakogenetika of farmakogenomika bestudeer die uitwerking en newe-effekte van medikasie op individue gegrond op hulle genetiese samestelling. Die tempo waarteen lewerensieme gemetaboliseer word, kan byvoorbeeld getoets word om die geskikste dosis medikasie (byvoorbeeld antidepressante) vir ’n spesifieke pasiënt te bepaal.

Genetiese siekterisiko’s is iets wat bestuur kan word. Dit help jou om swangerskappe beter te beplan, om te voorspel wanneer sekere goed waarskynlik in jou lewe gaan gebeur en om ingeligte, mediese besluite te neem oor wat nou en in die toekoms die beste vir jou gesondheid gaan wees.

“My family health portrait” is ’n gratis aanlyn hulpmiddel wat jou help om jou familie se gesondheids-geskiedenis uiteen te sit.

Indien jy enige probleme bespeur, kan jy dit met jou dokter bespreek, wat jou sal adviseer oor toetse wat gedoen moet word en voorkomende optrede wat nodig mag wees.

[KYK OOK] Video: Dit wat in ons gedagtes aangaan beïnvloed ons gesondheid

Ellenore Meyer Ellenore Meyer, mediese dokter
Kliek hier vir meer videos en artikels deur Ellenore.