Gee jou klerekas ʼn makeover

0
219
klerekas_winter.jpg

Dis weer een van dáárdie dae. Niks wat jy aantrek, lyk reg nie. Wat jy nodig het, is ’n klerekas-regruk!

Jou dae van ’n kas vol klere maar met niks om aan te trek nie, is verby! Ons het by Suna Roberts, voorkomskonsultant, gaan aanklop om seker te maak jy lyk elke dag eksieperfeksie.

Hoekom koop jy klere wat jy nooit dra nie?

Daar is baie redes waarom jy heeltemal te veel geld uitgee en heeltemal te min klere het waarin jy goed lyk en voel. Wat doen jy verkeerd?

Die kleur pas jou nie. Jy is dalk ook een van daardie vroue wat “veilige kleure” verkies omdat jy nie uitspattig wil lyk nie, maar daardie einste kleure laat jou uitgewas lyk. Dis belangrik dat jy kleure moet dra wat by jou veltoon pas. Let op na wanneer jy komplimente kry soos: “Sjoe, jy lyk goed!”
Dit sal eendag weer pas. Hoeveel te klein klere bêre jy vir “eendag”? Intussen maak dit jou moedeloos elke keer as jy daarin vaskyk. Of jy dra miskien klere wat te groot is om dit waarvoor jy skaam is, weg te steek. Klere wat nie vir jou pas nie, hoort nie in jou kas nie!
Dit was op ’n uitverkoping. Dis moeilik om ’n winskoop te weerstaan, nè? Maar iets wat jy nie regtig nodig het nie en nie eintlik by iets anders in jou kas pas nie, is nié ’n winskoop nie!
Dis nog altyd jou styl. Iets wat tien jaar gelede by jou gepas het, werk dalk nie meer nie. Moenie by dieselfde styl en kleur vashaak nie. Probeer iets nuuts, want jou figuur verander deur die jare.
Jy doen te veel koopterapie. Koop jy meer klere as wat jy nodig het? Dalk is daar ’n emosionele leegheid wat jy met inkopies probeer vul. Probeer vasstel wat die onderliggende probleem is en los dit op.
Dit het sentimentele waarde. Een of twee items, dalk. Jy kan egter nie alles hou net omdat dit jou aan iets herinner nie.
Jy kyk nooit in die spieël nie. Dalk vermy jy spieëls omdat jy nie hou van hoe jy lyk nie. Die probleem is dat jy dan ook nie sien of jou klere pas en goed lyk nie. Jy gaan net nóg slegter voel en al minder van jouself begin hou.
Daar is te min lap. Klere wat te veel vel wys, trek om verkeerde redes aandag. Dis belangrik dat jy vir jou ouderdom aantrek. Ouderdom is nie jou vyand nie! Jy kan altyd stylvol lyk – in die régte klere!
Jy is ’n etiketslaaf. Jy koop iets as dit die regte etiket het, ongeag of dit by jou leefstyl en figuur pas. Die ander uiterste is ook ’n probleem: Jy ooridentifiseer met jou leefstyl (soos moederskap) en trek onvleiende denims en los hemde aan.

Noudat jy weet watter foute jy maak, moet jy eers deur jou klerekas werk. Jy moet seker maak dat elke item daar hoort. As jou antwoord op enige van die volgende vrae “nee” is, moet die kledingstuk uit tensy jy dit kan verander in iets wat nuwe lewe daarin gaan blaas.

Kliek hier vir Suna se klerekas "makeover" video.

[pagebreak]

Bekyk jou klerekas aan die hand van die volgende vrae:

Het jy dit die afgelope jaar gedra?

JA

NEE

Pas dit by jou leefstyl?

JA

NEE

Vlei dit jou figuur?

JA

NEE

Is dit in ’n goeie toestand?

JA

NEE

Is dit nou in die mode? As jy nie weet nie, dan is dit tien teen een nie.

JA

NEE

Is dit een van jou 3 beste sentimentele uitrustings?

JA

NEE

Is dit in ’n kleur wat jou die meeste vlei?

JA

NEE

Kan jy dit saam met ongeveer 3 ander items dra?

JA

NEE

Voel jy gemaklik daarin?

JA

NEE

Kry jy komplimente wanneer jy hierdie uitrusting dra?

JA

NEE

[pagebreak]

Top-10-items wat jy dié winter in jou kas moet hê

Die volgende items vorm die basis van ’n goeie, sinvolle wintersklerekas. Dis nie ál wat jy kan hê nie, maar dit sal jou “ek weet nie wat om aan te trek nie”-dae verminder.

Swart langbroek. Dit werk goed vir die kantoor, saans en selfs bedags vir ’n formele voorkoms. Jy kan swart by enigiets dra en dis verslankend!
swart_broek.png
Swart hakskoen. Dis ’n skoen wat jy in die dag of aand kan dra: by langbroeke, denims, rompe, vir formele of informele funksies. Dit rond enige uitrusting af, winter of somer.
hakskoene.png
Swart of bruin stewels. As jy swart én bruin stewels kan hê, is dit goed. Anders, kies swart; bruin gee ’n effens sagter voorkoms. Maar almal moet ten minste een paar mooi stewels hê. Kry ’n styl wat by jou pas.
stewesl.png
Plathakskoene. Swart is die vanselfsprekende keuse, maar as jy ’n dramatiese stylpersoonlikheid het, koop ’n paar rooies ook.
rooi_skoene.png
Netjiese wit, swart en grys T-hempies. Jy kan dit saam met enigiets dra en kleur gee met ’n klomp verskillende bykomstighede.
hempies.png
Klein swart rokkie. Jy kan dit werk toe of kerk toe dra en vir ’n formele funksie sprankel gee met die regte bykomstighede.
swart_rok.png
Snyersbaadjie.
Dit maak enige gewone uitrusting interessanter. Dis tydloos en pas by enige ouderdom.
snyers_baadjie.png
Jas. Jy sal dit vir jare dra, en al sit jy ’n bietjie gewig aan, sal dit steeds pas. ’n Jas lyk goed oor enigiets – van ’n denim tot ’n pak klere.
rooi_baadjie.png
Jeans. Kies’n denim in ’n donker kleur omdat dit by almal pas en verslankend is. Jy kan dit saam met enigiets dra, van ’n vaal T-hemp tot ’n blink toppie.
jean.png
Knooptrui. As jy kan, kry een in swart (steenkoolgrys of vlootblou vir blondines), en ook in ’n ander mooi kleur wat by jou pas.
knooptrui.png

SKRYF IN VIR ONS KOMPETISIE:

Wen ’n nuwe klerekas ter waarde van R20 000! Kliek hier vir ons kompetisie bladsy.