Hou jou gemoed positief

1418
Lynette Beer

Onaangename gebeurtenisse ontlok dikwels sterk emosionele reaksies en bly langer in jou geheue. Wanneer jy deur ’n uitdagende tyd gaan, is dit belangrik dat jy jou hart – jou gedagtes, nie die orgaan wat bloed pomp nie – deurgaans beskerm.

Wees baie versigtig met dit wat jy daagliks in jou gemoed laat afspeel. Soms beleef jy ’n goeie dag, alles gaan voor die wind. Dan, onthou jy skielik hoe iemand jou te na gekom het en kort voor lank voel jy hartseer en moedeloos.

Studies wys dat positiewe en negatiewe herinneringe deur verskillende dele van die brein bestuur word. Die prefrontale korteks is verantwoordelik vir die negatiewe denkproses. Hierdie gedeelte is oorontwikkel, amper hiperaktief in mense met depressie, omdat hulle oor ’n lang periode aanhoudend pessimistiese gedagtes koester.

’n Pynlike herinnering neem meer spasie in die brein op omdat daar soveel meer is om te prosesseer. Daarom onthou jy slegte ervarings makliker. Dit beteken dat die negatiewe ’n groter impak het en meer gewig dra.

Om te oorleef en jou lewensvreugde te behou moet jy pro-aktief wees en jou denke doelbewus bestuur. Moenie popcorn spring en ’n stoel nadertrek wanneer somber gedagtes soos ’n fliek in jou kop begin afspeel nie. Vermy gedagtes soos “ek kan nie glo hulle het my so seergemaak nie”.

Verander onmiddellik na ’n program wat jou oorwinnings, dit wat jy bereik het, en dit wat jou nóú gelukkig maak, wys.

–Lynette Beer, motiveringspreker

Kliek op voelgoed.co.za/3-minute-selfhelp vir Lynette se video- en oudioreeks.