[VIDEO] Lae– of hoë– intensiteit–kardio?

836

Kardio-oefening is goed vir vetverbranding, maar moet ’n mens lae- of hoë-intensiteit-oefening doen vir die beste resultate? En hoe lank?

Die voordeel van oefening en ’n gesonde dieet is die vermindering van gevaarlike vet. Hoeveel vet jy verloor, hang egter af van die intensiteit van jou oefensessies. Lae- en hoë intensiteit-kardio kompeteer al jare met mekaar in fiksheidsdebatte. Vandag vergelyk ons dié twee.

Hoë-intensiteit beteken harde oefening wat jou asem laat jaag. Dit bestaan uit intervalle van maksimale inspanning afgewissel met rusperiodes. Met lae-intensiteit is die tempo baie gemakliker en kan jy dieselfde pas langer volhou.

Hoë-intensiteit-kardio verg meer inspanning oor ’n halfuur as lae-intensiteit. Dit beteken meer vetverbranding en groter energieverbruik. Navorsing het bewys dat eersgenoemde 50% meer vet verbrand in minder as ’n tiende van die tyd wat jy aan lae-intensiteit-kardio bestee.

Vir die meeste voordele in die kortste tyd word hoë-intensiteitoefening gevolglik aanbeveel. Hou net in gedagte dat as jy ook gereeld kragoefeninge met swaar gewigte doen, jy versigtig moet wees vir te veel hoë-intensiteit-oefening, aangesien dit die herstel van jou spiere kan belemmer.

Hoeveel kardio moet jy dan doen? As jou mikpunt spesifiek is om van die vetjies ontslae te raak, is twee tot drie sessies van 20 tot 30 minute per week genoeg. As jy voel dis nodig om meer kilojoules te verbrand, kan jy nog ’n sessie byvoeg. Moenie met te veel te vinnig begin nie, anders gaan jou liggaam daarby aanpas en sal jy baie ure se kardio moet doen om dieselfde resultate te sien. Jou swaarverdiende spiertjies gaan ook begin verdwyn.

Beide vorme van kardio is goed en al twee kan help met vetverbranding. Dit hang alles af van waarvan jy die meeste hou en hoeveel tyd jy beskikbaar het.
 

Marijke Cilliers, persoonlike afrigter

Kliek hier vir meer videos en artikels deur Marijke.