Maak aftrede sonder voldoende fondse jou bang?

Tydens my finansiële praatjies dui baie mense aan dat aftrede hulle bang maak, ongeag hulle ouderdom, geslag of beroep.

Dit kan verstaan word as mens in ag neem die statistieke wys dat minder as 3% Suid-Afrikaners kan aftree sonder om hulle lewensstandaard drasties te verlaag. Die vraag wat elke vrou haarself moet afvra: ‘hoeveel spaargeld het ek nodig vir aftrede en het ek ‘n plan om by daardie syfer uit te kom?’

Dis alreeds angswekkend om net aan die tydlyne vir die voor-aftrede en na-aftrede periodes te dink.

Daar is baie faktore wat ‘n invloed het op die voor-aftrede periode, met ander woorde die tydperk wat jy beskikbaar het om vir aftrede te spaar. Voltydse studies na skool, ‘n oorbruggingsjaar of ‘n sabbatsjaar, onbetaalde verlof, tydelike onderbreking in diensjare om na die kinders om te sien, afleggings by die werk en vervroegde aftrede het alles ‘n direkte impak op hoeveel tyd jy beskikbaar het om te kan spaar vir aftrede.

Boonop leef die huidige generasies heelwat langer wat dit ook angswekkend maak om aan die na-aftrede periode te dink. ‘n Paar dekades gelede het mense ongeveer 75 jaar oud geword. Aftree-spaargeld moes dus kon voorsien vir ongeveer 10 jaar vanaf aftree-ouderdom. Huidige generasies word maklik 95 jaar oud wat beteken dat aftree-spaargeld vir ongeveer 30 jaar moet voorsien vanaf aftrede op 65 jaar. Om op te som: die voor-aftrede tydperk waartydens gespaar kan word, word korter, maar in dieselfde asem word die na-aftrede tydperk waarvoor afree-spaargeld voorsiening moet maak al hoe langer. Dit is verseker ‘n gedagte wat enige iemand sal bang maak.

Dit is belangrik om jou posisie jaarliks te herevalueer en te bereken hoeveel spaargeld jy nodig het vir aftrede gebasseer op jou huidige posisie / lewensstandaard. Stel ‘n plan op om jou te help om jou doelwit vir aftrede te kan bereik. Moenie slegs op pensioenfondse en aftree-annuiteite staat maak nie. Voeg ander tipe bates by jou aftree-portfolio wat ‘n inkomste vir jou kan genereer na aftrede. Oorweeg dit om eiendomme, effektetrusts en besighede by jou aftreeportfolio te voeg wat ‘n annuiteitsinkomste vir jou sal genereer na aftrede.

Gedurende die volgende 10 weke gaan ek die 10 grootste finansiële bekommernisse van baie Suid-Afrikaners in meer detail bespreek. Volg my Finesse voelgoed blogs en teken gratis in op my YouTube kanaal vir nog waardevolle finansiële raad:

https://www.youtube.com/channel/UCNxhoBjk_oaiB1td0u0A8ow

Vorige artikelWegkruipertjie
Volgende artikelLiefdes briewe in die storm
Blogger - Ronel Jooste
Ronel Jooste is ‘n Geoktrooieerde Rekenmeester met meer as ‘n dekade se korporatiewe ervaring in die bank, versekering en beleggingsindustrieë. Huidiglik het sy haar eie finansiële welstand maatskappy genaamd FinanciallyFiTLife. As finansiële coach en konsultant help sy mense met hulle persoonlike finansies; besighede met hulle besigheidsfinansies en bied ook werkswinkels en finansiële welstandprogramme aan. Ronel het haar eie finansiële geselsprogram op All-Time Radio; sy skryf graag artikels vir verskeie publikasies asook haar eie blog; en tree as spreker op by geleenthede waar sy haar passie vir finansiële fiksheid deel. Saam met haar suster besit sy die PhysEQFiT Gastehuis en privaat gym in Centurion. Ronel is ‘n fiksheidsfanatikus en hardloop, gym, gholf en fietsry is deel van haar daaglikse leefstyl. Haar droom is om mense te inspireer om ‘n gesonde, aktiewe, gelukkige en finansieël welvarende leefstyl te leef. Besoek Ronel se webtuiste www.financiallyfitlife.co.za vir meer blogs, hulpmiddels en hoe Ronel jou kan help met persoonlike of besigheidsfinansies.