Nooit sal God enige iemand wegwys!

Ek wil graag die volgende met julle deel, diamantjies wat my hart bekruip het een Stiltetyd oggend.

DAAR IS ‘N SKAT IN WARE SOEK, dit is WARE VIND!

Dit geskryf het ek aan die volgende begin dink…

Geen soek lewer geen resultate = koud

Half-hartige soek lewer net halwe resultate = lou

Heel-hartige soek lewer volle resultate = ‘n hart aan die brand

Daar is mos ‘n vers in die Bybel wat sê … was jy maar eerder warm of koud maar nou omdat jy lou is moet Ek jou uitspoeg (Openbaring 3 vers 16).

In my verstaan het iets ewe skielik begin kliek … ons sal nooit die volle amazingness wat moontlik is in verhouding met God kan vind as ons nie heelhartig daarna soek. Halfhartig en lou-wees werk mos nooit lekker vir lang-termyn nie. Dit behou mens se aandag net totdat iets wat meer aanloklik vertoon verby geflikflooi kom.

Julle ek hoop hierdie woorde moedig julle aan, net soos vir my, om daagliks die dieper dinge in God na te spoor.

Daar is eindelose wonderskone horisonne in ons God se hart. Hulle vra … sal julle ons wandelpadjies saam met die Koning der konings kom bewandel?

Met my hele hart glo ek, ons het nog net die bodem aangeraak. Daar is grond in God wat nog omgedolwe moet word. Vars rou diamante wat hierdie huidige generasie uitnooi. Gaan ons hulle ontgin of gaan ons sê ag nee wat, los dit maar vir die volgende geslag?

Ek wil beslis sê nee … Ons sal hierdie offer nie deur ons vingers laat glip nie. Ons sal aanmeld en aanteken vir die wonderskone God elke dag meer ontdek en die wonders van Sy hart met die wêreld deel! 

Ai julle dis die warmste mooiste uitnodiging.

Kom ons sê ja. Nie uit vrees maar betowering. Dit is wat Jesus se Hy-het-dit-nie-verdien maar vir-ons-het-Hy-dit-gedoen Golgota-prys regkry. Nie?

Tonne liefde en baie mooi bly tot ons weer gesels! x

Vorige artikelWen ’n Poo-Pourri geskenkpak ter waarde van R400!
Volgende artikelNog ’n dag
Blogger - Letitia Pienewald
Letitia Pienewald is ‘n doodgewone mens wat die wonder van hartsintimiteit met God ontdek het en ander graag help om dit ook te vind. Daar was ‘n honger in my hart na meer van Jesus en toe vra ek Hom vir meer. So is die blogs King of Kings en Anker van Hoop gebore. Ek het begin om gediggies van God neer te skryf maar dis nou al veel meer. Dis ‘n voorreg om my pad saam met die Here met julle te deel. ‘n Gebed is dat my en jou bewondering vir God altyd nuut en vars sal bly. Verder is ek lief vir die lewe en so dankbaar vir genade en hoop, waarsonder ek nie kan nie.