Sê nee vir verkeerde skuld

0
937

Die beste raad vir geld leen is: Moet dit nie doen nie. As jy nie anders kan nie, loop katvoet vir die negatiewe effek van saamgestelde rente.

Die een of ander tyd kom ons almal by ’n stadium dat ons skuld moet maak. Jy sal waarskynlik ’n motor of ’n huis koop, kredietkaartskuld of ’n persoonlike lening aangaan. Die nadeel is dat geld wat jy leen, kan keer dat jy ryk word.

Ken die verskil tussen goeie en slegte skuld

Ons lees in die Bybel dat mense wat geld leen, slawe word van die geldskieters. Dis so waar! Onthou net, daar is goeie en slegte skuld. As jy geld leen sodat dit tot ’n inkomste kan bydra, is dit goed, maar as dit jou niks in die sak bring nie en keer dat jy finansieel vooruitgaan, is dit sleg.

’n Huislening kan voordelig wees. Jy het tog ’n stabiele blyplek nodig vir jouself en jou geliefdes. Vir jou aftrede is dit ook ’n goeie belegging.

Om egter ’n klomp geld vir ’n troue te gaan leen, help niks om aan jou welvaart te bou nie. As jy regtig lief is vir jou aanstaande, moet tog nie julle lewe saam met ’n negatiewe bankbalans begin nie. Wees eerlik met jouself: Wil jy ’n deftige troue hê net sodat mense agterna daaroor kan praat?

Om geld te leen om ’n onderneming te begin is potensieel goeie skuld, mits jy ’n goeie besigheidsplan het en die verwagte maandelikse wins genoeg sal wees vir die paaiement op die lening. Hier is ’n wenk van miljoenêrs en biljoenêrs: As jy ’n besigheid wil begin, begin klein. Finansiering vir die motor waarmee jy werk toe en terug moet ry, is goeie skuld, maar om ʼn duur motor te koop waarvan jy skaars die maandelikse afbetaling kan bybring net sodat jy daarmee kan spog, is effens dwaas.

Jy moet kan wag vir iets wat jy wil hê

Ons verval maklik in die gewoonte om ons onmiddellike behoeftes te bevredig deur kredietkaarte, oortrokke fasiliteite, persoonlike lenings en klererekeninge. Wat ons eintlik doen, is om ons toekomstige inkomste vir onmiddellike bevrediging te verruil.

As jy ’n televisiestel koop en dit oor drie jaar afbetaal, verruil jy die satisfaksie van ’n beter skerm vir ’n gedeelte van jou salaris vir die volgende drie jaar. Of as jy ’n motor oor vyf jaar finansier, gee jy ’n groot hap uit jou salaris vir die volgende vyf jaar in ruil vir wiele.

Die ergste is jy spandeer nou geld wat jy eers in die toekoms moet verdien. Jy het lankal vergeet van die mooi klere en die oorsese reis wat jy geniet het. As jy kredietkaartaankope doen, moenie langer as ’n maand met daardie skuld sit nie. Betaal dit dadelik aan die einde van die maand af. Banke laat jou gewoonlik toe om 55 dae rentevrye aankope te maak. Hulle doen dit nie omdat hulle Kersvader is nie. Hulle weet die meeste mense oorskry daardie rentevrye periode, en hulle betaal dan eintlik rente van die eerste dag af.

Knyp geld af en betaal skuld op jou kredietkaart

As jy bestaande skuld het en jy kan ’n paar rand êrens afknyp, betaal dit af op jou kredietkaart. Dit maak net sin om jou spaargeld hiervoor te gebruik as jy 24 persent rente moet opdok. Die uitdaging is om nie nog goed te koop wat jy nie kan bekostig nie.

’n Mens neem gewoonlik ’n huislening uit vir gemiddeld 20 jaar. Daar is selfs huislenings van 30 jaar. Al wat dit beteken, is jy het baie tyd om die kapitaalbedrag af te betaal. Uiteindelik betaal jy die bedrag drie- tot viervoudig terug aan rente. As jy mooi daaroor gaan dink, het ’n huis van R500 000 jou uiteindelik R2 miljoen gekos.

Jy het R1,5 miljoen aan die bank betaal vir die voorreg om ’n R500 000-huis te besit. Die oplossing is om moontlik ’n korter termyn te oorweeg vir jou lening. Sewe jaar is die ideale tydperk, waar jy so min as moontlik rente betaal en so vinnig as moontlik kapitaal delg.

Wouter Snyman, attooh!

Kliek hier vir meer videos en artikels deur Wouter.