Van jou gedagtes vas

Is dit nie verbasend hoe vinnig ons gedagtes kan dwaal en ons onsself bevind in ‘n posisie waar ons ons bekommer en stres oor verskeie aspekte van ons lewens nie?

Ons mag dalk een oomblik heel goed voel, en dan skielik, skynbaar uit die niet word ons gedagtes weggeruk na die land van “Wat as?”

Vrees, bekommernis en angs is dikwels geestelike gevegte wat in ons gedagtes woed, wat ons lei om te fokus op hipotesis wat nog nie, en heel waarskynlik nie sal gebeur nie. Dit is Satan, die wêreld of ons eie vlees wat ons uitlok om God se karakter, veral sy goedheid, sorg en mag, te bevraagteken. Hierdie vrees kan ‘n manifestasie van ongeloof wees.

Volgens Paulus is die antwoord om hierdie wederstrewige gedagtes te beheer, om “elke gedagte gevange te neem,” en ons doen dit deur “die vernuwing van ons gedagtes.”

Vang jou gedagtes vas

Wederstrewige gedagtes roof, plunder en maak dood. Dit ruk ons ​​soms uit ons slaap, skep allerhande onrus, vermeerder in erger gedagtes, steel vreugde en verswak ons hoop en geloof.

Hierdie gedagtes moet gevange geneem word omdat hulle vernietigend en gevaarlik is vir ons geloof en strydig is met die gedagtes wat God wil hê ons moet hê.

Dit is maklik om hierdie gedagtes toe te laat om in ons te maal en ons dan uitgeput en vernietig te laat. Om teen hierdie gedagtes te veg, is moeilik omdat hierdie vyande meedoënloos en sonder genade is.

Al te dikwels veg ons hierdie oorlog met die verkeerde wapens. Wêreldse raad, menslike wysheid, persoonlike vindingrykheid en mensgemaakte planne is nie opgewasse teen hierdie soort oorlog nie. Dikwels skiet ons onsself in die voet omdat ons hierdie gedagtes, wat tot vrees en angs lei, koester.

Om ons gedagtes vas te vang beteken dat ons hierdie denkwyse moet aanspreek. Ons moet ons gedagtes onderdanig maak aan God se Woord terwyl ons bely wat waar is teenoor dit wat ons vrees.

Hernu jou gedagtes

Om dit te kan doen, het ons krag nodig wat nie inherent in ons is nie. Ons het die Kaptein van Engele Weermagte nodig, die een wie se regterhand krag is. Ons het God se krag wat in ons werk nodig en Hy werk deur Sy Woord.

Die Heilige Gees gebruik die Skrif om “ons argumente, verskonings en wederstrewige gedagtes te diskwalifiseer en ons te wys wat reg is.” (Sam Storms).

Daarom moet ons ons Bybels as ons kosbaarste skat beskou. Dit is ‘n arsenaal van goddelike wapens. Dit is ‘n tweesnydende swaard wat lewendig en kragtig is.  Dit sny die  gedagtes uit wat ons laat weg beweeg van die waarheid, en nader na die swart gat van leuens en vrees.

Konfronteer al jou gedagtes en toets hulle aan die waarheid in die Skrif.

Bid en vra die Here daagliks om jou sterkte in hierdie stryd te wees, om jou denke te verander, om angstige gedagtes te vervang met dit wat goed en waar is en om jou geloof te versterk sodat jou hoop gevind word in wie God is en wat Hy gesê het en nie op ons eie wysheid en krag nie.