Voorkom seer knieë na oefening

0
386
jy_vra.jpg

Jy wil so graag genoeg oefen en hopelik ʼn paar kilogramme afskud. Tog sukkel jy met pyn in jou knieë, hoe nou gemaak?

“Ek het lank nie geoefen nie en ook ’n paar kilogram aangesit. Toe het ek weer begin stap, maar ná ’n intense sessie sukkel ek egter pyn in my knieë. Wat kan ek doen om dit te verlig?”

Die produkspesialis sê:

Ek beveel aan dat jy ’n aanvulling drink wat gehidroliseerde kollageen bevat. Dié stof is die algemeenste proteïen wat in kraakbeen, spiere, senings, ligamente en bene voorkom.

Dit is verantwoordelik vir die elastisiteit van die kraakbeen en beskerm dit teen verswakking en agteruitgang. Kollageen is ook die boustene van kraakbeen en kan help om skade aan jou ligamente te voorkom.

Omega 3-vetsure het anti-inflammatoriese eienskappe en kan daarom help om styfheid, pyn en die verwering van die gewrigte te voorkom. Antioksidante is weer bekend daarvoor dat hulle die vrye radikale kan teenwerk wat selle beskadig. Dié stowwe kan help om die vermindering van kollageen en agteruitgang van kraakbeen te stuit. Vitamien C is nodig om kollageen te vorm en vitamien E beskerm die liggaam se weefsel teen die skade van vrye radikale.

MSM (metielsulfonielmetaan) kan, tesame met kollageen, die vervaardiging van kraakbeen bevorder en help om pyn en inflammasie in die gewrigte te verminder. JOINTEze® kapsules (149,99 vir 60 kapsules) bevat al hierdie bestanddele. Kry dit by jou naaste apteek.
Apteker, Nativa

Die biokinetikus sê:

Met kniepyn moet jy kyk waar en wanneer die pyn voorkom. Kyk ook watter posisies en/of bewegings die pyn vererger of verlig.

Stap is eintlik die veiligste oefening wat daar is. Dit het nie dieselfde impak op jou gewrigte as draf nie. Doen ook eerder minder oor ’n langer tydperk as te veel, te vinnig en te gou. Fiksheid neem tyd en daar is nie kortpaaie nie.

Onthou ook om te strek. Strekoefeninge is seker een van die belangrikste aspekte wat beserings kan voorkom, maar dit word dikwels afgeskeep.

Ander aktiwiteite wat jy kan oorweeg, is fietsry, water-aërobiese oefeninge, roei en trappe klim. Oefen ten minste 30 minute lank drie tot vyf dae per week. Raadpleeg ’n biokinetikus voor jy ’n knieoperasie laat doen, want dit is dikwels ’n biomeganiese probleem wat reggestel kan word.
Prof. Cilas Wilders, hoof van die Instituut vir Biokinetika by die Noordwes-Universiteit

Die ortopediese chirurg sê:

As jy lank onaktief was, lyk jou skelet, spiere en ligamente anders as dié van ’n professionele sportvrou. Wanneer jy na ’n lang tyd van stilsit weer begin oefen, sal die weefsel in jou liggaam begin aanpas.

As jy te hard oefen en jou lyf nie genoeg kans gee om aan te pas en te herstel nie, sal die weefsel begin afbreek. Dit is soos iemand wat blase op haar hande ontwikkel as sy skielik harde handearbeid begin doen, maar nie daaraan gewoond was nie. Dit lei tot pyn in die gewrigte. Dit kan chronies raak as jy nie na jou lyf luister nie en “deur die pyn” probeer oefen.

Gewigstoename is ook ’n belangrike faktor wanneer dit by seer knieë kom. Mense begin oefen om gewig te verloor, maar die ekstra gewig plaas baie druk op die knieë, wat ook pyn kan veroorsaak.

Jy is dikwels ook teleurgesteld as jy hard oefen, maar aanvanklik nie gewig verloor nie. My raad is om stadig te begin en jou nie te ooreis nie. Onthou, om fiks te wees beteken jou liggaam is aangepas om kilojoules in beweging om te sit!
Dr. Dirk Nell, ortopediese chirurg en kniespesialis