Nuwe Jy
Ontmoet ons finaliste en stem vir jou gunsteling!
Die Begin van 'n Nuwe Reis
Soveel vroue skrik op 'n dag wakker en wonder: “Hoe het ek tot hier gekom?” Oorgewig, ongesond en ongelukkig met die prentjie in die spieël. Tog vermoed jy dat daar 'n beter vrou, ma of lewensmaat hier binne skuil as jy maar net jou kop, hart en lyf op die regte koers kan kry. Ons Nuwe Jy-selfverbeteringsprogram is juis met hierdie doel ontwikkel. Dié program fokus op holistiese gesondheid, gewigsverlies, persoonlike groei en selfvertroue!
Die 60-Dae-Uitdaging en Nuwe Jy-Program
Aan die begin van die jaar skryf vroue hulle in om aan die 60-dae-uitdaging deel te neem. Elke deelnemer kry 'n eetplan, oefenprogram, dieetwenke, motiveringsvideo's én meer! Almal wat goeie vordering gemaak het op die 60 dae-uitdaging, kan hulle dan inskryf vir die Nuwe Jy-program. Twintig vroue word genooi na 'n aanlyn onderhoud en tien word gekies om intensief aan die werk te spring. Uiteindelik word 'n finale top-6 vroue aangewys.
Ondersteuning en Transformasie
Ons borge is gereed om elke finalis in ʼn nuwe mens te omskep. CSN se eetplan help met gewigsverlies, terwyl Willa Krause Velsorg se uitmuntende produkte verseker dat almal met ʼn gesonde, gloeiende vel spog. Sielkundige Catherine van Heerden ondersteun die vroue ook op emosionele en geestelike vlak met groep- en individuele sessies. Leer ons finaliste beter ken en stem vir jou gunsteling voor 8 September om jou eie mini-make-over te wen!
Petro Schlaphoff (59)
“Ek doen dit vir my gesondheid én my selfbeeld. Ek wil elke dag beter voel.“
In die laaste jaar van haar 50’s wil Petro aan haarself en ander bewys dat jy nooit te oud is om vir jouself op te daag nie. Sy werk as administrateur en die stres van haar beroep was lank ’n struikelblok. Maar met musiek as haar toevlug en ‘n nuwe doelwit voor oë, is sy gereed vir haar transformasie tydensd die Nuwe Jy-program.
Mia Meyer (56)
“Ek wil nie meer myself oordeel en in ‘n hoekie wegkruip nie – ek wil saam met my familie en vriende aktief wees en pret hê”
Sy werk in die finansiele afdeling van ‘n firma as rekening spesialis, maar vir Mia is die belangrikste rekening om te betaal dit wat sy haarself skuld na jare wat sy haarself afgeskeep het. Sy wil weer voluit lééf – gesond, mooi en gelukkig.
Karen Fourie (58)
“My dogter trou in Junie en ek wil nie net mooi lyk nie, ek wil lekker voel op haar troue.”
As apteker, het Karen baie uitdagings by die werk, maar dit is niks in vergelyking met die fibromialgie en rumatoïede artritis waarmee sy moet saamleef nie. Tog beur sy elke dag vorentoe en bly sy positief.
Sonja Roux (38)
“Ek was altyd hard op myself oor kos en my gewig – nou leer ek om myself te versorg en lief te hê, en om sagter met myself te wees.”
As ’n juffrou vir kinders met spesiale behoeftes, het Sonja baie liefde om te deel, maar min daarvan is selfliefde. Sy het nog altyd te min tyd vir haarself gemaak.
Na ’n heupoperasie in 2024, het sy egter besluit dit is tyd om ook vir háár lewe plek te maak.
Yolindie Dirker (39)
“Die feit dat ek alreeds vier maal per week oefen help my om ‘gesond te dink’ wat dit makliker sal maak om ook gesonder te eet. Ek wil gemakliker in my vel voel – dis tyd dat ek weer myself raaksien.“
As’n siviele ingenieur en introvert is dit nie vir haar maklik om deel te neem aan ‘n program waar jy jou hart en siel moet deel nie. Maar sy het besluit dat dit tyd is vir ‘n positiewe verandering in haar lewe en sy wil haarself uitdaag om die beste weergawe van haarself te wees – ongeag wat dit van haar vra.
Christine Gagiano (31)
“Ek is lief genoeg vir myself om hierdie verandering te maak – sodat ek gesond kan leef én gesonde waardes kan oordra.“
Sy staan elke dag voor ‘n klas as lektor om haar studente te help om hul drome na te jaag. En nou is dit tyd dat sy haar eie drome waar maak. Christine kies ‘n gesonde leefstyl nie net vir haarself nie, maar vir die gesin wat sy droom om eendag te hê.
Ena Albrecht (52)
“Ek is baie gefokus en gedertmineerd, maar ek is ook geduldiger met myself. Ek besef dat Rome nie in ‘n dag gebou is nie en ek moet nou goeie gewoontes vestig wat my gesondheid sal bevorder op die langtermyn. Maar, ek is op die regte pad!“
As ma van drie, ouma van een en franchise bestuurder, dra Ena baie hoede, maar sy het besluit haar gesondheid is nou topprioriteit. Ná jare van emosionele eet, het sy ’n nuwe verhouding met kos begin bou. Een van die goeie gewoontes wat sy reeds gevestig het is om drie maal per week pilates te doen.
Heleen Janse van Vuuren (61)
“Hierdie keer is my ingesteldheid reg, ek wil goed voel in my lyf én in klere – en ek werk daaraan met oorgawe.“
Met ‘n veeleisende beroep as skooldirekteur én lektor in Rekeninigkunde by NWU, is ‘n oorvol program en stres ‘n faktor om mee rekening te hou. Maar Heleen het besluit dat dit nie langer ‘n verskoning is vir die gewig wat sy jaar na jaar optel nie. Veral omrede dit haar selfbeeld ook nadelig beïnvloed. Intussen doen sy ‘diamond dotting’ en tuinwerk om haar stresvlakke onder beheer te hou.
Lize Cloete (37)
“My liggaam is die een plek waar ek altyd moet woon – ek kies nou om dit ’n goeie, gesonde plek te maak.“
Hierdie finansiële beampte, moes haar wortels optrek en van Naboomspruit na Pretoria verhuis vroeg die jaar, waar sy ‘n pos by ‘n skool vir leergestremdes aanvaar het. Hoewel die skuif haar lewe ontwrig het, het sy voet by stuk gehou – 2025 is haar jaar! En wanneer sy haar gesondheidsdoelwitte bereik het, wil sy ander inspireer met haar storie.
Tersia Jacobs (39)
“Ek het besluit om vir my gesondheid te veg. Ek weet dis nog nie te laat nie. Deur gewig te verloor kan ek diabetes en ander gesondheidsprobleme voorkom.“
Rekenaarstelsels is hierdie ma se kos, maar die feit dat sy van die huis af werk, hou groot uitdagings in, ondermeer dat sy hopeloos te veel peusel – veral wanneer die werksdruk hoog loop. Met haar veertigste verjaardag voor die deur en ‘n ma wat aan diabetes ly.