Veranderings wat jy vandag in jou leefstyl maak, kan oor baie jare vorentoe sorg dat jou liggaam stadiger verouder en jou risiko vir siektes verminder. 

Gebruik kollageen om veroudering te help vertraag 

Natuurlik speel verskillende faktore ’n rol in hoe jy verouder, hoe gesond jy is en hoe jeugdig jou voorkoms is. ’n Aanvulling wat jy beslis moet ondersoek, is kollageen.

Vanaf jou middel-twintigerjare verminder jou liggaam se voorraad teen ’n tempo van 5% per jaar. Dit is deel van die liggaam se natuurlike verouderingsproses.

Navorsing toon dat jy jou vlakke kan verhoog deur gehidroliseerde kollageenpeptied-supplemente te neem. Dit is nooit te vroeg of te laat om te begin nie!

Hoewel dit nie permanente skade in die liggaam kan herstel nie, hou hierdie wonder-bestanddeel baie voordele in. Indien jy dit eers op ’n latere ouderdom begin gebruik, kan dit verdere veroudering help vertraag en lewenskwaliteit bevorder.

Dit verhoog die elastisiteit en vogtigheid van jou vel. Die vesels van hierdie proteïen voorsien jou spiere met wat nodig is om te beweeg. Só ook verbeter die bloedvloei deur jou hele lyf omdat are se wande sterk en buigsaam is.

Dit verbeter die gesondheid van jou hare en naels en help met beendigtheid. Soos jy ouer word, verslyt en verswak die kraakbeen. As gevolg hiervan begin die ledemate pyn en verloor dit buigsaamheid.

Die gebruik van gehalte-aanvullings verminder hierdie ongemaklike simptome. Selfs die spysverteringskanaal word deur kollageen versterk. Maar die beste nuus is sekerlik dat dit vetweefsel verbrand en spierbou bevorder.

Een aanvulling, baie jare se mooi lyk en fantasties voel … Maar jy moet ook sorg dat jou leefstyl voedsame kos, oefening en voldoende slaap insluit. Rond jou prentjie dan af met die regte haarstyl, grimering en klere.

Gesond eet en leef sal jou langer jonk laat voel 

Baie vroue dink hulle moet minder eet om gewig te verloor en gesonder te wees. Dis nie volhoubaar nie. Kies eerder ’n goed gebalanseerde eetplan en gereelde oefening.

Dit laat jou goed voel, want voedsame kos en beweging het ’n positiewe effek op die brein. Jy kan beter fokus en meer produktief werk. Boonop lyk jy jonger, want die effek van veroudering verminder en jy word beter teen leefstylsiektes soos diabetes beskerm.

Los jou kos soveel moontlik in hulle natuurlike vorm en koop so min moontlik geprosesseerde produkte. Verminder die inname van verfynde stysels en hoë-vet items.

Probeer verskillende voedselgroepe met elke maaltyd bedien – sluit in proteïen, volgraanstysel, gesonde vette, suiwelprodukte en vrugte/groente.

’n Goeie riglyn om te volg, is om een kwart van jou bord met stysel te vul. (Dit kan iets wees soos ’n koppie rys, pasta of patat, ’n gebakte aartappel, gekookte mielie of twee snye lae GI-brood.) So ’n porsie is ongeveer die grootte van jou gebalde vuis.

Die volgende kwart van jou bord kan jy vul met proteïen, soos hoender, vis, vleis, bone of ander diere- of vegetariese produkte. Die porsie is ongeveer die grootte van jou handpalm.

Die helfte van die bord wat oorbly, kan jy dan vul met slaaie of groente, byvoorbeeld ’n groenslaai, koolslaai en/of geroosterde/ gekookte of gebakte groente.

Laastens is een tot twee lepels gesonde vet vir smaak of gaarmaak. Kies vet van plantaardige bronne soos olywe, olyfolie, margarien, neute, sade, avokadopeer of lae-vet slaaisous.

Eet kleiner, gereelde etes. As jy te lank sonder kos gaan deur die dag, ooreet jy jou dalk saans.

Maak eerder gesonde maaltye tuis as olierige wegneemetes. Wees waaksaam om nie klomp ekstra vet of suiker by jou kosse te voeg wanneer jy dit gaarmaak nie.

Vervang een glas koeldrank of een koppie koffie daagliks met ’n glas water.

Klein, volhoubare veranderings gaan jou baie verder bring as groot doelwitte wat jy nie kan volhou nie. Een ekstra porsie groente gaan vir jou baie meer beteken ná ’n jaar as ’n streng dieet wat jy net vir twee weke kon volhou.

Verlaag stresvlakke voor jy sielsmoeg en vroeg oud word 

Jy moet presteer, spertye haal, kinders grootmaak, geld verdien, en nog staande bly vir dié om jou. Geen wonder jy is gespanne nie!

Ironies genoeg is matige druk noodsaaklik vir motivering om beter te doen en produktief te wees. Oormatige en langdurige swaarkry is die probleem.

Dit lei tot liggaamlike en geestesiektes en laat jou oud en afgerem voel en lyk … Langdurige blootstelling aan spanning put jou energievoorrade uit en kan selfs tot die dood lei.

Maar wat kan jy hieraan doen? Gebruik verskillende maniere om meer te ontspan.

Neem ’n kort “vakansie” en gaan in jou gedagtes na jou happy place. Sit byvoorbeeld op die strand terwyl jy die branders hoor en die warm sand onder jou voete voel. Maak jou oë toe en gebruik al jou sintuie. Dit sal voel of jy regtig daar is.

Ontspan al jou spiere volgens hulle spesifieke groepe. Begin deur diep asem te haal. Trek elke spiergroep saam en ontspan dan weer. Begin by die voorkop en beweeg af tot by die tone. Sodoende leer jy hoe om styfheid in jou spiere te voel en makliker te ontspan.

Die 4-7-8-asemhalingstegniek vereis dat jy op lang, diep asemhaling moet fokus. Ritmiese asemhaling verminder angs en laat jou beter slaap.

Blaas al die lug in jou longe uit. Asem dan vier sekondes deur jou neus in en hou jou asem sewe sekondes lank in. Asem hard deur jou mond uit en maak ’n “suis”-geluid vir agt sekondes. Herhaal tot vier keer.

’n Ongesonde dieet (veral as jy ’n emosionele eter is) kan dalk tydelike “verligting” bring, maar op die lange duur bydra tot spanning. Voedsame kos, byvoorbeeld eiers, avokado en okkerneute, reguleer jou emosies en ondersteun energievlakke.

Luister hoe jy met jouself praat. Indien jy konstant vir jouself sê: “Ek kan dit nie doen nie,” sal dit dinge net moeiliker maak. Praat op ’n positiewe, inspirerende manier met jouself.

Fisieke oefening laat jou meer ontspanne voel en help ook met die verbetering van jou geestesgesondheid. Stap, swem, ry fiets of sluit by ’n gimnasium aan.

Gehalte-slaap verleng lewe, maak maer en verminder plooie 

Volwassenes het sewe tot nege uur se slaap nodig terwyl tieners agt tot nege en ’n half uur se ononderbroke slaap benodig. Dit wissel van persoon tot persoon, maar ’n mens leer jou liggaam ken.

Die meeste mense sukkel van tyd tot tyd om te slaap. Daar is talle oorsake hiervoor, enigiets van hormonale versteurings tot trauma of erge spanning.

Indien die probleem voortduur en in slapeloosheid verander, sal jy al die simptome van intense moegheid begin ervaar. Dit kan skadelik vir jou gesondheid en welstand wees.

Die algemeenste gevolge van ’n tekort aan slaap, is verswakte prestasie omdat die geheue sowel as kognitiewe vermoëns aangetas word. Emosionele probleme en uitdagings, soos depressie, angstigheid en erge gemoedsversteurings, vererger met te min of te veel slaap.

’n Groot uitdaging is die gesondheidsprobleme wat ontwikkel as gevolg van onvoldoende rus. Voorbeelde hiervan is gewigstoename, ’n hormonale wanbalans, hartaanvalle, hipertensie, beroertes en geestesiektes.

Sorg dus dat jy ’n goeie nagrus inkry. Deeglike voorbereiding is die hoofbestanddeel vir enige suksesvolle gewoonte.

Rig eerstens jou slaapkamer reg in as ’n ordentlike rusplek. Hou die vertrek donker. Die minimum lig wat pla, is altyd beter. Sorg vir ’n rustige atmosfeer met nie-steurende, herhalende geluide.

Reguleer die temperatuur; koeler is beter. Belê in ’n goeie matras en kussings. Vervang dit elke drie tot ses maande. Maak jou kamerruimte vir jouself visueel mooi.

Berei jouself daarna voor. Moenie twee uur voordat jy inkruip swaar maaltye eet nie. Maak seker dat jy goed gehidreer is en besoek die badkamer voordat jy gaan lê. Vermy ’n halfuur voor ligte af tegnologie soos telefone en rekenaars met blou lig.

Bly by ’n vaste roetine en koester dankbare, vredevolle en aangename gedagtes. Hou ’n notaboekie langs jou bed waar jy alle goeie idees of dinge wat jou bekommer neerskryf.

Oefening help vir slaap en so ook die uitsny van stimulante soos koffie ná 15:00.

Stel jouself bloot aan natuurlike sonlig, dit versterk jou sirkadiese ritmes en slaapsiklus. Kry genoeg magnesium in. Dit reguleer neuro-oordragstowwe in die senuweestelsel en ook die melatonien-hormoon, wat slaapsiklusse in jou liggaam beheer.