“Elke huwelik sal hoogte- en laagtepunte hê,” sê GRETHA WIID, aanbieder van die AANLYN KURSUS Aanhou probeer of eerder gaan?
Herken betyds die gevaartekens wat jou verhouding kan verwoes
Wat ’n huwelik kan verwoes, verskil van paartjie tot paartjie. Herken betyds die gevaartekens en moenie hulle ignoreer en hoop op beter dae nie.
As julle konflik uitloop op mishandeling, moet jy dit ernstig opneem. Van julle probleme kan opgelos word met professionele hulp, maar ander kan die rede wees dat skei die beste uitweg is.
Ons het verskonings hoekom ons mense in die rede val. Moenie! Want as ’n mens gereeld in die rede geval word, groei jou frustrasievlakke. As die probleem nie opgelos word nie, begin ’n saad van ergerlikheid tussen julle ontkiem.
Wreweligheid in ’n verhouding is ’n groot probleem. Later is jy so geïrriteerd met jou wederhelfte dat niks wat hy doen jou meer gelukkig maak nie.
Tydens konflik begin julle mekaar persoonlik aanval. Wat van as die liefde van jou lewe, jou altyd slegsê. Jy kom later op ’n plek waar jy nikswerd voel.
As daar dan nog blaamverskuiwing bykom, is dit ’n ernstige rooi lig. Want as julle vir mekaar sê dit gebeur omdat julle mekaar kwaadmaak, wie se las is dit? En hoe word die probleem opgelos?
Jy is nie ’n vloerlap nie. Jy is nie ’n objek nie. Jy is nie ’n speelding nie. Jy is nie net ’n ma wat maar net jou dienste moet lewer nie. Moenie hierdie rooi lig van die tafel af vee en grappies maak oor wellus en dit gering ag nie.
As daar seksuele afwesigheid en kilheid is, is ’n slaapkamer die koudste plek in die hele wêreld. Of om agter die slaapkamerdeur misbruik te word, is die slegste vorm van misbruik wat ’n vrou kan beleef.
’n Vrou of man wat buite die slaapkamer na ander mans of vroue kyk – dit is ’n vorm van egbreuk.
Daar moet ware berou wees en bereidwilligheid om professionele hulp te kry vir ’n seksuele verslawing of seksuele koudheid.
Huwelike kan bloei oor dinge wat van buite af inwerk
’n Huwelik kan ’n affair oorleef. As daar owerspel en ontrouheid in hulle huwelik was, kan ’n paartjie daardeur werk. Maar daar is ook gevalle waar dinge nie weer heelgemaak kan word nie.
Byvoorbeeld as dit ’n lang affair was. As dié ontrouheid ’n lang, diep emosionele konneksie behels het, is die kans vir ’n huwelik om daarna te herstel, baie skraal.
Doen God wonderwerke? Ja. Maar as ’n man eers bereid was om sy gesin buite sy huwelik op so ’n manier emosioneel af te skeep … As ’n man eers by daardie punt gedraai het, het hy eintlik sy karakter gewys.
Indien daar so ’n diep verbintenis was, of as dit ’n geval is dat hy sê hy het lief geword vir haar – moenie bly nie!
Daar is huwelike wat bloei oor dinge wat van buite af inwerk soos finansies of kleintyd-trauma. Daarom is die bereidwilligheid om aan julle huwelik te werk ’n moeilike onderwerp.
Struikelblokke is nie altyd dinge wat jy kan identifiseer as iets waarvoor julle hulp benodig nie.
Soms is dit iets wat saam met julle kom en verwydering bring. Julle besef iets is nie meer reg nie. Ons moet iemand gaan sien. Of ons het dringend verandering nodig …
Die beauty van sommige verhale is wanneer al twee mense kan sê: Ons is bereid om hiervoor te baklei. En die hartseer werklikheid is dat as dit nie só is nie, moet jy dalk eerder gaan.
