Moedertaalonderrig is die hoeksteen van die Afrikaner se erfenis, maar Engels neem oor. Die Solidariteit Skoleondersteuningsentrum (SOS) baklei teen die verengelsing van tradisionele Afrikaanse skole om die voortbestaan van die taal en kultuur te verseker.
Die belangrike rol wat taal in ’n kultuur speel
Die belangrikheid van moedertaalonderrig is oor dekades heen deur talle navorsingstudies bewys. Leerders wat in hulle eie taal leer, vaar deur die bank beter in akademiese ontwikkeling.
Hierdie beginsel is veral van toepassing binne die konteks van Suid-Afrika, waar verskeie moedertale amptelik erken word, maar Engels dikwels as die taal van onderrig, veral in die hoër grade, verkies word.
As ons terugkyk in die geskiedenis, was moedertaalonderrig nog altyd die fondament waarop Afrikaanse skole se sukses gebou is.
Taal is die draer van kultuur, tradisies, asook ’n spesifieke manier van dink en wees.
Wanneer skole verengels, verloor hulle nie net die taal nie, maar ook ’n deel van die identiteit wat met daardie taal gepaardgaan.
Die verlies van Afrikaans in skole beroof kinders van hulle erfenis
Moedertaalonderrig in skole is veel meer as net ’n praktiese keuse – dit hou Suid-Afrika se ryk kulturele en taalkundige erfenis lewendig.
Wanneer skole met trotse Afrikaanse name, soos die Laerskool Rachel de Beer en die Hoërskool Langenhoven, verengels, verloor ons nie net ’n taal nie, maar ook ’n stuk identiteit.
Hierdie skole, wat eens die kern van Afrikaanse onderwys was, verander in plekke waar kinders in ’n tweede of derde taal leer.
Dit wys hoe moedertaalonderrig onder druk verkeer.
Skole soos die Laerskool Jongspan en die Hoërskool Gerrit Maritz is reeds Engels – ’n bewys van hoe vinnig hierdie verskuiwing plaasvind.
Afrikaans is nie net woorde nie; dit is hoe ons dink, voel en verstaan. As ons dit verloor, verloor ons ’n unieke perspektief op die lewe.
Só help die SOS leerlinge, onderwysers en ouers.
Met jare se ervaring in die onderwysveld, werk die SOS onverpoos om oplossings te bied wat bydra tot die sukses van leerders en onderwysers. Besoek skole.co.za vir meer inligting.
Akademiese voordele daarvan om in jou eie taal te leer
Die argument teen verengelsing in Afrikaanse skole is nie net gegrond op emosie of kultuur nie; dit het ’n sterk akademiese grondslag.
Internasionaal groei die bewustheid oor die waarde van moedertaalonderrig, met navorsing wat ’n duidelike verband tussen moedertaalonderrig en akademiese prestasie toon.
Lande soos Finland en Nederland dien as uitstekende voorbeelde van hoe studies in jou eie taal ’n sleutelrol in die akademiese sukses van leerders speel.
Suid-Afrika, met sy diverse taalrykdom, behoort hierdie insigte te gebruik om alle leerders, insluitend Afrikaanssprekendes, die beste geleenthede vir sukses te bied.
Leerders wat in hulle eie taal onderrig word, verstaan konsepte beter, ontwikkel sterker kritiese denkvaardighede en presteer kognitief beter oor verskeie vakgebiede.
Sodra kennis in die moedertaal bemeester is, kan dit maklik na ’n tweede of derde taal tydens verdere studie oorgedra word.
Twee- of meertaligheid is die perfekte oplossing
Een van die grootste gevare van die verskuiwing na Engels is dat dit dikwels gemotiveer word deur die begeerte om internasionale geleenthede vir leerders te verbeter.
Hoewel dit belangrik is om leerders toegang tot Engels as gemeenskaplike taal te bied, moet dit nie ten koste van moedertaalonderrig geskied nie.
Navorsing beklemtoon dat taal veel meer as bloot ’n kommunikasiemiddel is. Dit is ’n simbool van sosiale identiteit, wat persoonlikheid, selfwaarde, selfvertroue, ’n gevoel van geborgenheid, en ’n bepaalde kulturele waardestelsel weerspieël.
Verder toon studies dat meertaligheid nie net sosiale voordele inhou nie, maar ook kognitiewe verbetering bevorder, insluitend beter probleemoplossingsvaardighede en verhoogde kreatiwiteit.
Afrikaanssprekende leerders hoef dus nie ’n keuse tussen hulle moedertaal en Engels te maak nie – hulle behoort vrye toegang tot albei tale te hê om ten volle voordeel te trek uit die voordele wat meertaligheid bied.
