ATKV-Buffelspoort is ’n gewilde bosveld-vakansiebestemming in die Magaliesberge. Ontspan slegs ’n klipgooi weg van die wêreldbekende Sun City en minder as ’n uur se ry van Pretoria en Johannesburg af. 

’n Gewilde vakansiebestemming in die bosveld, net buite die stad

Dié oord is perfek vir aksie en avontuur, of net luilekker rus en vrede, en spog met ’n verskeidenheid ontspanningsgeriewe en vermaakaktiwiteite soos wipmatte, putt-putt, ’n waterglybaan, vlugbal, muurbal en nog vele meer.

Daar is verskillende soorte selfsorgverblyfopsies om van te kies en te keur soos die rondawels, Magalies-villas, asook ’n verskeidenheid woonstelle.

Benewens die 4-bedtenthuise het hierdie oase in die Magaliesberge ook ’n magdom kampeerstaanplekke onder skaduryke bome, of geplaveide staanplekke met skadunette, kragpunte en ’n braai-area. Uitstekende opwas- en ablusiegeriewe is ook beskikbaar.

Hierdie juweel is ook die ideale basis vanwaar jy die magdom toeristeattraksies in die omgewing kan verken en het iets vir oud en jonk om te geniet.

Boonop bied die omgewing se rustigheid die regte atmosfeer vir positiewe en verbeeldingryke besigheidsbeplanning.

Een van die beste kampplekke in die land