SOEKIE KROG van Radikids-faam het al haar kwota swak besluite geneem, maar dit het haar die vermoë gegee om vandag beter keuses te kan maak. 

Dit is jou keuse om te leer uit jou foute 

“Eendag moes ek en my dogter ’n onbekende pad ry,” vertel Soekie. “Aanwysings was onduidelik en ek was oortuig ons het verdwaal. Toe ek begin stres oor die moontlikheid dat ons die verkeerde pad gekies het, het my dogter verontwaardig gesê: ’Daar is nie ’n verkeerde pad nie, Ma, net ’n langer pad.’”  

Soekie vertel dat haar supervrou-prentjie daardie dag vernietig is. “Ek het besef ek mág foute maak. Soos ’n goeie pa, het die Here my soms toegelaat om my (harde) kop te stamp en iets daaruit te leer, sodat ek volgende keer eerder op Hom kan vertrou.” 

Dis steeds vir haar moeilik om groot besluite te neem, al is sy ’n Christen. Veral as die “links” en die “regs” van ’n situasie ewe goed lyk. “Ek het geleer dis ’n goeie navigasie-beginsel om te beplan en te beweeg vanwaar jy nóú is,” sê sy.