Op haar moeilike en seer reis met breinkanker het ELSJE NEETHLING, die Olimpiese swemmer Ryk Neethling se jonger suster, geleer hoe om elke dag vreugde te kies.

Ek was 13 jaar oud toe dit gebeur het. Toe ’n dokter uiteindelik die regte diagnose kon gee ná jare se kopkrap oor wat fout is met my.

Vroeg-vroeg in my lewe het ek al met hoofpyne, naarheid, dowwe visie en balans-probleme gesukkel. Party dokters het gemeen dis spanning. Ander het gedink dis dalk breinvliesontsteking.

Die waarheid het aan die lig gekom die dag nadat ek aan ’n groot swemgala deelgeneem het.

My pa het by my kamer ingestap met die koerant in sy hand.

“Poppie, jy moet nou ophou om jou te bekommer oor of jy die Vrystaat-span gaan maak.”

Daar was terg in sy stem. “Ons wil net hê jy moet gelukkig wees.” Geen reaksie nie.

Ek het op my sy onder die komberse gelê.

Sy stem was vol trots toe hy afbuk en die koerant vir my probeer wys.

“Pop, kyk. ...