[OUDIO] Verouder met grasie in liggaam en siel

Veroudering is ongelukkig onafwendbaar. Daar is egter daaglikse selfsorgwenke wat jy kan volg om hierdie ’n mooier, gladder meer vredevolle proses te maak. 

Wanneer jy jonk is, vertel niemand jou dat daar ’n tyd gaan kom wat jy nie meer gaan kan eet wat jy wil nie. Dat jy nie meer laat bed toe sal kan gaan en met net vier of vyf ure se slaap oor die weg kom nie. En dat die son nie jou vriend is nie, maar al die tyd die stille vyand … Alles bekruip jou soos ’n nare gewoonte.

Spyt … Spyt kom altyd te laat, maar daar is ’n leef-lewe daar buite. ’n Lekker jong lewe. Daardie jare is nou maar een maal die trappe wat jy moet klim op die pad na ’n slimmer, wyser, gryser jy.

Saam met elke nuwe pleidooi van ’n plooi, raak jou siel jonger, ligter en meer tevrede met wat is … wat was. Daardie tevrede-met-jouself-gevoel, die dit-wat-regtig-belangrik-is-gevoel, spruit dan tog uit ’n fronsplooi, ’n spataar of ’n grys haar.