[OUDIO] Verskuif jou fokus na die beste jy

Ons hoor gereeld dat waarop jy fokus, ’n groot invloed op jou ervaring van jou alledaagse lewe het. Hoe meer jy op iets fokus, hoe meer prominent raak dit. 

In ons besige lewe word ons voortdurend met uitdagende situasies gekonfronteer. Wanneer ons op die positiewe aspekte van ’n situasie fokus, is dit makliker om hierdie positiewe dinge in ons interpretasie van gebeure te inkorporeer. Dit is dus baie beter om op die positiewe kant van ’n situasie te fokus, want dit gaan jou gemoed positief stem. Dit beteken egter nie dat jy die negatiewe emosies moet ignoreer nie, want dit gee vir jou insig oor jouself. 

Navorsing het bewys dat optimistiese of positiewe individue baie makliker betekenis vind of groei ervaar in uitdagende situasies. ’n Optimistiese persoon hoef nie blind te wees vir die waarheid of probeer om “altyd” positief te dink nie. 

Jy kan steeds realisties in ’n situasie wees. Die sleutel is om jou emosies te bestuur sodat jy so ver moontlik in beheer van die situasie kan voel. Op hierdie manier gee jy jouself hoop vir die uitkoms.