Word beter en nie bitter nie

0
457
Liesel Krause-Wiid

Elke mens beleef die een of ander tyd teleurstellings. Ons lewe in ’n stukkende wêreld, en daarom kan ons nie mislukking vryspring nie.

Dalk het jou toekomsdrome nie werklikheid geword nie – jou huweliksbootjie het op die rotse geloop of jy is ongelukkig in ’n werk wat so aanloklik gelyk het.

Die samelewing is nie baie genadig teenoor foute nie. Dit word nie eintlik geduld nie, en tweede kanse is maar skaars. Nogtans is mislukking deel van die lewe. Moenie dan aangaan asof niks gebeur het nie. Gun jouself ’n kans om die teleurstelling te verwerk.

Hanteer jou emosies as jou planne nie slaag nie

Om op te staan en aan te gaan nadat jy misluk het, gebeur nie oornag nie. Jou emosies het nie ’n aan en af skakelaar nie. Jy gaan waarskynlik eers kwaad wees, met God wil onderhandel, of hartseer en depressief voel. Beleef eerder die verskillende emosies en gevoelens sonder om by een vas te haak.

Jy kan nie ’n skoon tafeldoek oor ’n tafel vol vuil borde gooi nie. Vat een emosie op ’n slag en praat met God daaroor. As jy jou seerkry vir Hom gee, kan Hy daarmee werk. As jy dit vir jouself hou, skiet dit wortel en kan dit jou vernietig. Om alles wat jy beleef en voel, neer te skryf is ook goeie terapie.

Leer uit jou foute. As jy iets uit jou seerkry leer of iemand anders kan bemoedig wat deur dieselfde situasie worstel, dan verander jou “mess” in ’n “message”. Mislukking is nie jou vyand nie, dit kan die kunsmis wees wat jou laat groei!

Wat saak maak, is hoeveel keer jy opstaan

Winston Churchill het gesê: “Sukses is nooit finaal nie en mislukking is nie fataal nie.” Dit gaan nie oor hoeveel keer jy val nie; wat saak maak, is hoeveel keer jy opstaan. Min mense kry dinge die eerste slag reg. Die suksesvolste mense in die wêreld het ’n hele klomp keer misluk voordat hulle geslaag het.

In Jeremia 18:1-9 lees ons hoe die pottebakker ’n stuk klei op die wiel draai. Toe die finale produk nie lyk soos dit moet nie, begin die pottebakker van voor af. Hy gooi nie die klei weg nie, hy maak iets nuuts. So kan jy ook nuut word ná mislukking as jy Hom toelaat.

Moenie dat een gebeurtenis bepaal wie jy is nie. ’n Mislukte poging maak jou nie ’n mislukking nie. Spreuke 24:16 sê ’n gelowige staan elke keer na ’n terugslag weer op. Toe jy leer loop het en geval het, het jou ouers nie gesê, toemaar, jy hoef nie te leer loop nie. Nee,  jy moes aanhou probeer tot jy dit reggekry het.

Ons het ’n groot verantwoordelikheid om vir ons kinders te wys hoe om mislukking reg te hanteer. Ons leef mos in ’n wêreld waar alles oor wen gaan. Wees ’n voorbeeld van iemand wat kan leer en groei uit mislukkings en nuwe deure kan raaksien en oopmaak.

Stel ’n doelwit vir die pad vorentoe

Veronderstel jou besigheid het in die moeilikheid beland – begin dan deur ’n plan te beraam om uit die skuld te kom. As dit rof gaan in jou huwelik, bid saam met jou maat, gaan vir berading, en begin saam droom oor die toekoms.

Gee elke dag jou beste al voel dit of moeilike omstandighede vir ewig aanhou. Doen wat jy doen so goed jy kan. Jy sal die vrugte daarvan pluk.

Iemand het eenkeer gesê as iets die moeite werd is om te doen, is dit die moeite werd om dit goed te doen. Doen dinge op die regte manier, selfs in die klein detail. Doen dit tot eer van jou Vader. Moenie in middelmatigheid en halfhartigheid vasgevang raak nie.

Josef was nie ’n sukses oor wat hy bereik het nie; hy het niks gehad as slaaf of in die tronk nie. Hy was suksesvol, want hy het God in sy lewe gehad.

Sukses gaan nie oor wie jy is nie, dit gaan oor Wie jy in jou lewe het. Soos Josef beleef ons ook soms terugslae, maar leer by hom wat dit is om nie verbitterd te raak as swaar tye jou tref nie. Teleurstellings behoort jou beter te maak, nie bitter nie.

Liesel Krause-Wiid, predikant

Kliek hier vir meer videos en artikels van Liesel.