[OUDIO] Ware vriendskap word nie gekoop nie

Struikelblokke kan ons maklik pootjie. Dit steel ons lewensvreugde. Nogtans kan jy kies om op te staan en dit as ’n geleentheid vir groei te gebruik.

Daar is ’n gesegde: Wys my jou vriende en ek wys jou jou toekoms. Ons word geken aan die mense in wie se geselskap ons gereeld verkeer. Vriende, anders as familie, is ’n keuse: ’n Mens kan kies saam met wie jy jou tyd wil deurbring. Iemand het gesê dit is die familie wat ons vir onsself kies. Jy deel jou drome, hoop, vrese en hartseer met hulle. Vriendskappe as sosiale verhoudings is van onskatbare waarde. Dit help jou ontwikkel en verskaf leiding op die kronkelende pad van die lewe. Jy word soos jou vriende, want julle praat oor dieselfde dinge. Hulle waarhede word jou waarhede en julle stem meestal saam oor sake.