Moenie op jou eie kragte staatmaak nie. Die boodskap uit die Woord vir jou vandag is: nie deur jou eie krag nie, maar deur sy Gees.

Geweld is nie die antwoord op jou probleme nie

Het jy al probeer om iets met geweld reg te maak? Dis vreemd om hierdie twee woorde in dieselfde sin te lees: geweld en regmaak. Dis duidelik ’n resep vir ’n katastrofe as iemand anders nie ingryp nie.

“Hier is die boodskap van die Here aan Serubbabel: Nie met mag en krag sal jy slaag nie, maar deur my Gees, sê die Here die Almagtige” (Sagaria 4:6).

Eenkeer probeer ek ’n slot oopsluit. Tot my groot frustrasie kry ek dit nie reg nie. Ek draai later die sleutel dat ek bang is dit gaan breek. Ek kap die slot; draai dit na al die kante toe, maar tevergeefs.

Tot my groot verligting stap my oudste seun verby. Hy loer in en vra hoekom ek so stoei. Nadat ek verduidelik het, gee hy ’n vermakerige laggie: “Mam, Mam moet net die pennetjie aan die agterkant van die slot uittrek.” Daar demonstreer hy sommer hoe die slot seepglad en sonder moeite oopgaan.

Ai, ek dink hoeveel tye in my lewe ek die berg voor my met geweld wou platvee.

Uiteindelik was ek weens my eie pogings moeg gespartel. Eers toe kon ek die Heilige Gees se raad vra en na Hom vir die oplossing draai.

Dié wat op die Here wag word opnuut versterk

Daar is een saak wat ons deurgaans hoor binne die tyd wat ons leef. Mense kla oor hoe moeg en uitgeput hulle is. Die eise van die lewe knyp maar vir almal. Dit raak so erg – vir baie gaan dit deesdae net oor “oorlewing”.

“Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judea en in Samaria en tot in die uithoeke van die wêreld” (Handelinge 1:8).

Só het ek self ook tye wanneer ek beslis sou verkies om net in die bed te bly. Maar dan herinner die Here my deur sy genade waar my krag vandaan kom.

Ek weet dat ek in staat is om goeie én slegte tye te deurstaan deur Christus wat my die krag gee.

Jesus het volgens Lukas 24 sy dissipels versoek om in Jerusalem te wag totdat hulle met krag “uit die hoogte” toegerus is. Soms moet ons wag; die tyd uitkoop.

Ons moet beskikbaar wees dat Hy ons volmaak met sy Heilige Gees – die Gees van KRAG.

Slegs dan kan ons elke dag doelgerig en kragtig voortgaan om sy koninkryk te bou.

Ek nooi jou uit: Laat die Heilige Gees jou binnekant versterk en jou nuwe krag en energie gee om voort te gaan.

Die mag van die koninkryk van God

As ek na hierdie gedeelte kyk, word ek herinner aan die deel in die Ou Testament waar Elia die Baälprofete uitgedaag het: “Bid julle tot julle God en dan sal ek tot my God bid en dan kyk ons wie se God antwoord” (1 Konings 18).

Die koninkryk van God is immers nie ’n saak van praatjies nie, maar van krag (1 Korintiërs 4:20).

Ek wonder soms of daar nie weer in ons tyd sulke tekens nodig sal wees om mense na die ware, lewende God te bring nie.

Mense is moeg “gepreek”. Daarby weet ons: Sou ons net die helfte kon toepas van wat ons al gehoor het, sou die koninkryk van God reeds soveel verder gevorder gewees het.

Moet my nie verkeerd verstaan nie. Ons kan nooit ophou om die verrassing van die Goeie Nuus te verkondig nie. Tog glo ek dat die tyd aangebreek het vir die koninkryk van God om in krag met nuwe tekens in ons wêreld deur te breek.

Ek wag met ’n opgewonde hart om die koninkryk van God in krag en heerlikheid te sien kom. Dan sal ons ingestel wees op die bonatuurlike wonderwerkende krag waar Hy sy wonders in en deur ons sigbaar maak.