Die oorgangsfase van skool na universiteit hoef nie oorweldigend te wees nie. Die Noordwes-Universiteit (NWU) bied praktiese raad en ondersteuning vir ouers én voornemende studente om dié proses te vergemaklik.
Maak seker jou kind het meer as een studie-opsie
Een van die grootste uitdagings vir matrikulante is om te besluit wat hulle ná skool wil doen.
Terwyl sommige leerders van kleins af seker is van hul droomloopbaan, voel ander onseker en bang om die verkeerde besluit te neem.
Hierdie onsekerheid is heeltemal normaal en deel van die ontdekking van eie belangstellings en sterkpunte.
Daarom bied die universiteit se gratis Belangstellingsbepaler (Interest Index) waardevolle leiding aan graad 8- tot 12-leerders.
Dié hulpmiddel help om moontlike studierigtings en beroepe te identifiseer op grond van ’n leerder se belangstellings.
Ná voltooiing ontvang elke leerder ’n persoonlike verslag wat as riglyn kan dien wanneer studiekeuses gemaak word.
Die NWU moedig ouers ook aan om saam met hul kinders prakties te beplan vir die toekoms.
Dit sluit navorsing oor toelatingsvereistes, verpligte skoolvakke, APS-tellings, moontlike loopbane en enige aanvullende assesserings in.
Deur vroegtydig alternatiewe studierigtings te oorweeg, kan leerders met groter selfvertroue en rustigheid vir hul toekoms voorberei.
Die NWU se aansoeke het op 1 Junie 2026 geopen.
Doen nou aansoek by https://studies.nwu.ac.za/af/studies/aansoeke.
Gee jou kind die ruimte en geleentheid om verantwoordelikheid te neem
Baie ouers besef eers in matriek hoe groot rol graad 11-uitslae in universiteitstoelating speel.
Hierdie uitslae word dikwels gebruik vir voorlopige oorweging en voorwaardelike aanbiedinge vir verskeie kwalifikasies.
Daarom help dit om vroeg reeds te weet watter APS-telling benodig word, watter vakke verpligtend is en of daar taalvereistes of aanvullende keuringsprosesse van toepassing is.
Die NWU se APS-sakrekenaar bied aan ouers en leerders ’n eenvoudige manier om huidige tellings te bereken en realisties vir toelating te beplan.
Benewens akademiese voorbereiding is universiteit ook dikwels ’n jongmens se eerste groot stap na onafhanklikheid.
Die universiteit moedig ouers aan om kinders reeds vroeg verantwoordelikheid vir hul eie administrasie te laat neem.
Dit sluit in om ’n professionele en aktiewe e-posadres te hê, wagwoorde veilig te bêre, self toegang tot aansoekinligting te bestuur en gereeld e-posse na te gaan.
Hierdie eenvoudige gewoontes help om selfvertroue, verantwoordelikheid en onafhanklikheid vir die nuwe fase van hul lewe te ontwikkel.
Digitale dokumente en studiefooie, maar geniet die oomblik!
Een van die grootste oorsake van onnodige stres tydens universiteitsaansoeke is wanneer families op die laaste oomblik begin soek na belangrike dokumente.
Ouers en leerders moet vroeg reeds ’n digitale vouer skep waarin alle nodige dokumente veilig gestoor word.
Dit sluit ’n persoonlike e-posadres, ’n geldige ID-dokument en finale graad 11- of graad 12-uitslae in PDF- of JPEG-formaat in.
Omdat dokumente individueel tydens die aansoekproses opgelaai word, help dit om elke dokument apart te skandeer en te organiseer.
Studiekoste kan ook vir baie gesinne oorweldigend voel. Daarom voorsien die NWU duidelike inligting oor verwagte kostes, aansoekfooie en finansiële ondersteuning.
Die universiteit bied verskeie beursmoontlikhede, insluitend akademiese merietebeurse, sportbeurse, leierskapsbeurse en ondersteuningsbeurse.
’n Matriekjaar gaan vinniger verby as wat baie ouers verwag.
Tussen die administrasie, punte en voorbereiding ontdek jongmense terselfdertyd hul plek in die wêreld en begin hulle die eerste tree na hul toekoms gee.
