Sommige sleutelelemente van doeltreffende kommunikasie sluit in duidelikheid van boodskap, stemtoon, lyftaal en relevansie vir die luisteraar se belangstellings en behoeftes. MIA SLABBERT glo ook dat jou woorde baie belangrik is.
Hoe kan jy mense se aandag vasvang sodat hulle luister, verstaan en oortuig word deur jou boodskap?
Ons het hierdie behoefte om na geluister te word: in die werkplek, by die huis en in jou verhoudings.
Maar tog straf ons onsself, want ons wonder “hoekom”. Hoekom wil ek op die berge staan en my boodskap uitbasuin? Hoekom wil ek hê mense moet my hoor?
Die behoefte om gehoor te word is deel van ons menswees
“Woorde het krag. Dit wat jy sê, gaan gebeur.” Daar’s regtig baie waarde in hierdie woorde. Almal moet dit heeltyd in gedagte hou wanneer hulle praat, skryf en dink. Dit moet ’n riglyn in jou lewe wees.
As ’n mens is dit natuurlik om ’n begeerte te hê vir sosiale interaksie en ’n behoefte om gehoor en verstaan te word. Om na geluister te word, kan ’n gevoel van bevestiging, ondersteuning en erkenning van ons gedagtes en gevoelens verskaf.
Ongeag jou agtergrond, jou toekoms, dit wat gebeur het of dit wat met jou gedoen is, daardie behoefte om gehoor te word, is so diep in ons menswees ingeplant.
Wat moet jy doen sodat mense vir jou luister?
Leer as leier van voor af om te praat en luister
Te veel leiers dink hulle is base. Te veel dink dat kommunikasie is praat, praat en nogmaals praat.
Baie dink ook nog die praat moet gereeld kwaai, outokraties en af-praat op ander wees.
As jy werklik ’n leier wil wees, leer weer luister. Leer die kuns aan om ander te laat voel jy hoor hulle. Jy hoef nie alles vir almal te doen nie. Laat hulle net gehoor voel.
Dit is ’n belangrike kuns van leierskap en ook ’n groot uitdaging: Luister na die mense saam met jou. Hulle is nie onder jou nie; hulle is saam met jou in jou organisasie. As jy dit nie verstaan nie, gaan jy af-praat na mense toe.
Tegnologie kan kommunikasie makliker én moeiliker maak
Sosialemedia-platforms het ons in staat gestel om ons gedagtes en ervarings met ’n groter gehoor te deel, en om kontak te maak met mense wat ons dalk nie andersins ontmoet het nie.
Aan die ander kant het dit ook nuwe uitdagings geskep. Ons kommunikeer nou deur skerms eerder as van aangesig tot aangesig, wat dit moeiliker maak om emosies en bedoelings akkuraat oor te dra.
Dit kan lei tot misverstande en swak kommunikasie, wat verhoudings kan belemmer.
Om werklike, betekenisvolle verhoudings met ander te bou, verg meer as net likes en opmerkings op sosiale media – dit verg opregte moeite en konneksie.
Luister is net so belangrik as praat
Een van die belangrikste vaardighede om te hê wanneer dit kom by mense om na jou te luister, is om sterk kommunikasietegnieke te ontwikkel.
Om te begin, is dit belangrik om seker te maak dat jy op ’n selfversekerde, respekvolle manier praat wat jou boodskap doeltreffend oordra.
Sodra jy die basiese beginsels van goeie kommunikasie bemeester het, kan jy voortgaan om ’n aktiewe luisteraar te wees. Dit vereis dat jy nie net luister na wat iemand sê nie, maar ook hoe hulle dit sê.
Praat vir jouself en wees duidelik oor jou behoeftes, en wees selfversekerd en bondig om dit uit te druk. Dit sal ander help om te besef dat jy op ’n doeltreffende manier kommunikeer en hulle sal meer geneig wees om jou woorde ernstig op te neem.
