Elke mens verdien respek. Niemand is gemaak om ’n vloerlap te wees nie. En die lewe is te kort om oor alles ’n pity party te hou.

As jy altyd soos die slagoffer voel en dink ander kom jou te na, is dit ’n goeie idee om daardie “ander mense” in jou lewe beter te probeer verstaan. As jy weet hoekom iemand op ’n sekere manier optree, is dit makliker om nie te dink alles wordop jou persoonlik gemik nie.

Leer mense ken en verbeter jou omgang met hulle

Mense verskil, en as jy iemand beter leer ken, kom jy agter wie hy of sy regtig is. Dit verg wysheid om goed met ander mense oor die weg te kom. Vir die toekoms, hou hierdie vier basiese tipes in gedagte voordat jy dink alle mense smee ’n komplot teen jou.

Die dolfyn-persoonlikheid is altyd opgewek en vrolik. Hulle is snaaks, geniet dit om te sosialiseer en is dikwels die middelpunt van die geselskap. Ons almal ken hulle – dit is daardie vriendin of kollega wat altyd almal bymekaar kan bring en dinge kan reël. Die dolfyn val nie maklik vas in selfbejammering nie. Hulle is te besig om iets of iemand anders te organiseer.

Die leeu-persoonlikheid is gewoonlik die leier van ’n maatskappy of ’n organisasie, of die kaptein van ’n span. Hulle loop voor. Hierdie persoon sal baiekeer nie ander se gevoelens in ag neem nie. Wanneer jy met ’n leeu werk, moet jy weet om nie fyngevoelig en liggeraak te wees nie.

Almal kort ’n bietjie van die verskillende tipes

Ek was op ’n stadium in my lewe net ’n leeu. Ek het op mense getrap en was onbewus van hulle gevoelens. Die dag toe ek leer om mense te behandel vir wie hulle is, het ek ook my verhoudings heeltemal anders begin hanteer. Dit het verander van spanning en onsekerheid na pret.

Die tier-persoonlikheid is daardie vriendin wat haarself maklik begin bejammer. Sy voel maklik almal loop oor haar. As jy ’n tier is, beteken dit jy is analities, jy doen dinge korrek, jy neem nie maklik besluite sonder om seker te wees dis die regte besluit nie en jy is ’n perfeksionis. Jy kritiseer jouself (en ander) gedurig. Jy is liggeraak. Moenie altyd op die suur van die lewe fokus nie – verander jou uitkyk!

Ander mense mik nie altyd hulle woorde en optrede op jou nie. Hulle maak dalk ’n grap en lag, en jy dink dadelik hulle praat oor jou. Hulle praat nie oor jou nie, dis net hulle manier van leef. As jy altyd dink alles gaan oor jou, gaan jy ’n baie moeilike mens wees om mee saam te leef.

Die olifant-persoonlikheid voel ander misbruik hulle en niemand gee werklik om nie. Hulle is die “dienende Martha’s” onder ons. Hulle wil altyd die vrede bewaar. Hulle vermy enige konflik en daarom word probleme nie aangepak en opgelos nie.

Ken jouself, en hou op “telling hou vir ander”

Ons elkeen het ’n rol in die lewe. As jy die vredemaker is, weet dis jou werk. As jy die leeu is, lei dan ander met waardigheid en neem mense se gevoelens in ag.

As jy vandag voel ander trap op jou, vra jou af of jy nie dalk te fyngevoelig is nie. Dalk kom jy agter dat jy die lewe heeltemal te ernstig opneem. Jy moet probeer om meer pret te hê. Bring ’n bietjie meer dolfyn in jou lewe in of leer om dinge te konfronteer soos ’n leeu en nie gedurig weg te kruip in die skaduwee soos ’n tier of ’n olifant nie!

Daar is ’n Engelse gesegde wat sê: “Life is much more fun if you stop keeping the score for other people.” Die lewe is te kort om jouself jammer te kry en te dink ander loop oor jou. Leer om in die oomblik te leef en moenie te ernstig deur die lewe gaan nie. Dit is heeltemal oukei as ’n ander persoon ’n punt of twee aanteken. Leer om jou eie punte aan te teken en vier die oomblik.