Lag maak die lewe lekker

0
1064

Emosionele intelligensie beteken eintlik net dat jy tussen die reëls kan lees. Jy weet wat om met wie te doen en wanneer om dit te doen.

Ek kry baie te make met ouers en kinders. Een ding wat uitstaan as mense my kom sien, is of hulle humor verstaan of nie.

Iemand wat nie gekskeerdery in die goeie sin van die woord verstaan nie, is emosioneel arm, want hierdie persoon is geneig om alles persoonlik op te neem. Myns insiens moet ’n humorsin in die ouerhuis ingeoefen word, want dit help ’n kind om slim te wees met emosies.

Moenie alles te persoonlik opneem nie

Die lewe gaan oor verhoudings, en as jy weet hoe dit werk en dit reg kan hanteer, beteken dit mense hou van jou, want jy verstaan wie hulle is. Jy weet wat om te doen, wanneer om dit te doen en met wie. Onvolwassenheid rakende jou emosies beteken jy dink alles gaan altyd oor jou. Jy verander maklik in ’n negatiewe en kritiese mens, want jy glo die kalklig van die lewe skyn net op jou. Die kuns van die lewe is egter om verhoudings met ander te bou.

As jy altyd hartseer en ongelukkig voel of pessimisties en krities raak omdat ander jou nie reg behandel nie, beteken dit daar lê nog ’n bietjie werk voor vir jou.

Om grappies en ’n gelag in jou huisgesin in te span is ’n belangrike manier om jou kinders emosioneel intelligent te maak. Gaan dink daaroor: Hoeveel grappies maak julle en hoe baie lag julle saam? Ek en my vrou en kinders bou deurentyd humor in ons verhouding met mekaar in.

Gebruik dikwels humor en gaan lig deur die lewe

As daar mense na ons toe kom, begin ek altyd met ’n grappie, selfs met vreemde mense. Partykeer staan hulle by my voordeur en lui die klokkie. Ons deur is van glas, dus sien hulle my as ek aangestap kom. Maar dan kruip ek weg agter die middelste paneel van die deur en sê met ’n growwe stem: “Ekskuus tog, wie is daar?” Die reaksie van die mense aan die buitekant is verstommend, maar vertel ook op daardie oomblik vir my presies hoe om hulle te hanteer.

As die kind voor die deur verbouereerd raak of nie weet wat nou aangaan nie en die pa staan daar en dink ek is stapelgek, besef ek die gesin is nie baie gemaklik hiermee nie. Hulle maak nie gereeld grappies nie. Ek verander dadelik my aanslag en word meer formeel. Dan sê ek: “Toemaar, julle is by die regte plek. Kom gerus binne.” Dit wys vir my dat ek ’n pad met hulle sal moet stap.

Sê nou ek gaan staan agter daardie middelste paneel van my voordeur en sê weer in my growwe stem: “Wie is daar?” Na ’n paar sekondes besef die kind aan die ander kant ek is besig met ’n grap. As hy my in dieselfde stem antwoord, besef ek dis maklik om met die kind te werk, want hy kan tussen die reëls lees. Hy neem dinge nie te persoonlik op nie, en hy is heelwat ryper as baie ander mense as dit by emosies kom.

Gun almal ’n plekkie in die son

Party navorsers is oortuig daarvan dat giftige emosies, soos jaloesie, bitterheid en wantroue, ’n mens se gesondheid beïnvloed. Dit is net so gevaarlik soos slegte eetgewoontes. Mense wat geleer het om hulle emosies te identifiseer, te verstaan en reg te hanteer, is in liggaam en gees gesonder. As jy jou emosies verstaan en weet waar dit vandaan kom, kan dit jou hele lewe verander.

As jy nie soms vir jouself kan lag nie, is jy te veel van ’n realis. Jy is eintlik ’n pyn om mee te werk, want alles is mos op jou persoonlik gemik. Jy gaan sukkel met verhoudings, want mense gaan jou gereeld ontstig.

Leer om die humor in situasies raak te sien, want die lewe hoef nie altyd so ernstig te wees nie. Ons is maar onvolmaakte mense in ’n onvolmaakte wêreld waar almal ’n plekkie in die son gegun moet word.

Jannie Putter, mentor en motiveringspreker

Kliek hier vir meer videos en artikels deur Jannie.