Breek los van slegte geldgewoontes! Ontdek hoe eenvoudige veranderinge jou finansies kan versterk en jou op koers kan sit na finansiële sukses. Begin vandag! 

Ontdek die klein gewoontes wat jou finansies negatief beïnvloed 

Om te kom van waar jy nou is tot waar jy wil wees, moet jy ’n nuwe strategie of plan uitwerk. Dieselfde geld vir slegte geldgewoontes. 

Onthou, jou gewoontes is so deel van jou dat jy maar net sal doen wat jy nog altyd gedoen het as jy nie ’n definitiewe plan het nie.  

Die goeie nuus is dat hierdie plan of strategie nie perfek hoef te wees nie. Dit is eintlik net die beginpunt wat jou in die regte rigting sal stuur.  

Terloops, het jy geweet dat ’n vliegtuig wat van die O.R. Tambo lughawe na Kaapstad Internasionale Lughawe op pad is, vir 90% van die tyd nie presies op die regte koers is nie? Hoe kry die vlieënier dit dan reg om op die regte aanloopbaan op die regte lughawe te land? Dis eenvoudig: Hy maak heeltyd aanpassings terwyl hy vlieg.  

Net so sal jou strategieë ook soms verander, maar jy sal steeds in die regte rigting op pad wees.  

Die befaamde Amerikaanse skrywer David Bach het ’n boek geskryf, The Automatic Millionaire. Hierin praat hy oor die cappuccino-faktor. Dis daardie klein gewoontetjies van elke dag wat uiteindelik ’n massiewe uitwerking op jou begroting en finansies het. Hy sê ook dat deur net een of twee van daardie gewoontes af te leer en met iets anders te vervang, jy baie meer geld in jou sak kan hê.  

In Suid-Afrika kos ’n cappuccino ongeveer R30. As jy vir 20 dae elke dag ’n cappuccino drink, sal dit jou in die omgewing van R600 kos. As jy daardie R600 teen 10% rente belê, gaan jy oor 40 jaar, teen die tyd van jou aftrede, meer as drie miljoen rand hê.  

Jy kan dalk sê jy het nie 40 jaar oor om jou geld te belê nie, of dalk spandeer jy nie soveel geld op ’n cappuccino nie. Tog is daar altyd ’n area waar ons ons geld beter kan bestee. 

Leer goeie gewoontes aan vir wanneer jy met geld werk 

Baie mense sit laat in hulle lewe met die probleem dat hulle moet afskaal wat hulle tyd by die werk aanbetref, maar hulle het nie voorsiening gemaak en bates bymekaargemaak wat ’n aktiewe inkomste genereer nie.  

Die huidige statistiek is dat 97% van mense in ’n situasie is waar hulle nie slegte geldgewoontes kon afleer nie, en dus geen skatkis begin opbou het as ’n bate wat as ’n inkomste vir hulle dien nie.  

Gaan sit en dink wat jou cappuccino-faktor is. Dalk maak jy te dikwels ’n draai by die bakkery met die varsgebakte, lewensgrootte muffins. Of daardie skoenwinkel waarby jy net nie kan verbyloop nie. Dis die klein goedjies wat hier tel.  

Die gedagte is nie dat jy jouself klein luukses moet ontsê of dat jy nie die lewe mag geniet nie. Dis om die goeie gewoonte aan te leer om jou af te vra of jy die artikel regtig nodig het. Verstaan jy die uitwerking van jou aankope op jou beursie, en wat jy daarmee gaan doen?  

Ek het agtergekom dat suksesvolle mense suksesvolle gewoontes het. As jy gesond wil leef, beteken dit byvoorbeeld jy moet opstaan om te gaan oefen as jou wekker vyfuur in die oggend lui. 

Niemand gaan jou finansies vir jou bestuur of reël nie. Dis die harde werklikheid. As jy nie daardie slegte gewoontes gaan erken en teiken nie, sal jy altyd êrens iets koop wat jy nie nodig het nie, en aan die einde van die maand gaan jy buite jou begroting eindig.  

Dis baie moeilik om ’n slegte gewoonte af te leer, maar dis gelukkig baie makliker om ’n nuwe gewoonte aan te leer.  

Pas die 10-sekondereël toe. Besin voordat jy iets koop, want jy besef dalk net jy het nie die artikel nodig nie.  

Jy kan wegstap met R10 of R1000, wat jou in die toekoms kan help om jou finansiële situasie te verbeter. Een goeie gewoonte op ’n slag kan jou lewe verander.