Selfkennis help jou om jou ware self te ontdek, selfvertroue te vind en jou unieke krag te groei, sê LYNETTE BEER.
As jy weet wie jy is, sal jy ophou om jouself met ander te vergelyk en eerder fokus op jou unieke eienskappe.
Selfkennis help jou om ʼn beter leier, vriend, ouer, en vennoot te wees. Dit stel jou in staat om jou eie optrede te verstaan en swakpunte te herken.
Die waarde van selfkennis lê daarin dat dit jou help om emosionele intelligensie te ontwikkel. Dit help jou om jou innerlike krag te ontdek. Hierdie krag is noodsaaklik om jou persoonlike en professionele doelwitte te bereik.
Ons almal het ʼn droom in ons hart. Met die regte kennis kan daardie droom ʼn passie word wat ons na ons lewensdoel lei.
Dit begin deur dieper te delf as net jou naam, beroep, en suksesse. Jy moet jou karakter, temperament en persoonlikheid verstaan.
Temperament is die stel eienskappe waarmee jy gebore word en wat geneties oorgedra word. Jou karakter, aan die ander kant, word gevorm deur jou omgewing, geloof, waardes en lewenservarings. Dit is die essensie van wie jy werklik is.
Persoonlikheid is dit wat jy na buite wys. Wanneer ʼn persoon geïntegreerd is, stem sy karakter en persoonlikheid ooreen, wat die ideaal is.
