“Wat ook al gebeur, Hy is met my”

Op sangeres RIANA NEL se geloofspad was daar al baie op- en afdraandes. Sy stap dit dapper saam met God in die wete dat Hy elke dag goed is, dat ’n mens altyd veilig by Hom kan wees.

Op 19 het ek alleen van Namibië na Pretoria verhuis. Dit was erg en ek het baie gehuil, maar hierbinne was die wete dat die skuif nodig is om drome te verwesenlik.

Dit was nog altyd ’n probleem. Die onbekende laat my bang en onseker voel …

Dis makliker om vas te klou aan wat bekend is, selfs al was dit ook in ’n stadium vreemd en onbekend.

Dit laat my dink aan Petrus, wat uit die boot geklim en op die water geloop het. Dit was altyd vir my snaaks hoekom die ander dissipels dit nie ook gedoen het nie.

Toe die besef: Dit was Petrus se tyd en Jesus het gesê hy kan maar uitklim en loop.

Hy roep ons dikwels tot groter dinge, omdat ons tot meer in staat is as wat ons onsself gun om te glo …

Mense wonder ook dikwels: “Het ek reg gehoor?”

’n Goeie maatstaf: Die vyand se stem saai twyfel en vrees.

Dit laat jou sleg en skuldig voel. Daarteenoor is Sy stem positief en opbouend.

Van my kant af probeer ek net eerlik en opreg wees. Hy ken my beter as enigiemand, so dit help nie om voor te gee nie.

Om Londen toe te trek as jong volwassene het ek nie mooi oordink nie …

’n Klompie mistroostige maande waarin daar elke liewe dag angstig gevoel is.

Die kerk waar ek deel was van die lofprysingspan, was net goed vir my, maar later was ek op die vliegtuig terug Suid-Afrika toe … skaam en verneder.

Ten spyte daarvan, is ek nooit alleen gelos of in die steek gelaat nie. Hy was en is net altyd goed. Hierdie keer was dit ook so.

Terug op eie bodem is my heel eerste CD bekend gestel met die liedjie, “Lord you know”, op. ’n Lied wat in ’n koue Engeland, stoksielalleen op die kamermat van my woonstel geskryf is.

Alles werk ten goede mee vir dié wat Hom liefhet … hierdie woorde het intussen die fondament van my geestelike pad geword.

Ek moes ook aanvaar dat Hy elke dag goed is, dat ’n mens altyd veilig by Hom kan wees …

Daar is steeds dae van twyfel, van moeilik glo en sukkel om te vertrou, maar ook die wete: “Kyk terug op die verlede, Riri, na Sy track recordin jou lewe, en kiés.”

Wat ook al gebeur … dit hoef nie in my hande te wees nie.