Susan Oosthuizen is ’n 48-jarige finansiële krediteure- en rekeningebeampte by Laerskool Elarduspark in Pretoria. As gebore Vrystater het moeilike jare haar nie gebreek nie, maar gevorm en geleer om dankbaar te leef.

Nadat haar dogter Clarissa ernstig siek geword het en sy Amerika toe moes vlieg om haar by te staan, het Susan besef dat haar gewig haar terughou van die energie en vryheid wat sy nodig het. Haar gesondheidsreis het met Voelgoed se 60 dae-uitdaging momentum gekry. Vandag kies sy nie ’n kitsdieet nie, maar ’n doelbewuste leefstyl sodat sy saam met haar man Nico, kinders en kleinkinders voluit kan leef en God se wonderwerke kan raaksien.