Die storms in die lewe het aktrise en aanbieder CRYSTAL-DONNA ROBERTS geleer om elke dag te koester, elke verjaardag met oorgawe te vier, want môre, oormôre is dit dalk verby.
My ouma het altyd gesê dat niks sonder ’n rede gebeur nie. Alles op ons lewenspad het ’n spesifieke doel. Dit gaan nie soseer oor wat met jou gebeur nie, maar hoe dit jou karakter laat groei.
Party krisisse voel sinneloos en onnodig …
Lesse wat ’n mens liefs op ’n ander manier sou wou leer … maar dan word dit tog ’n motivering om harder te druk.
Om jouself verder te strek, en om agter te kom hoe sterk jy eintlik is.
My pad met borskanker is ’n goeie voorbeeld. Hoekom het dit gebeur? Watse lesse moes daaruit geleer word?
Dis steeds ’n raaisel, maar dit het my perspektief op die lewe verander en verdiep.
’n Noue ontkoming met die dood leer jou om elke dag te koester …
Om elke verjaardag met oorgawe te vier, want môre, oormôre is dit dalk verby.
Elke aspek van die lewe word nou meer intens waardeer. Oomblikke, geleenthede, gesprekke, vriendskappe … elke ervaring is spesiaal.
Ek het ook geleer om anders na my lyf te kyk …
Om goed te lyk en te voel was nog altyd belangrik, maar maak nie saak hoe hard daar geoefen of hoe versigtig daar geëet is nie, my effense boepie-maag was altyd ’n probleem.
Nie meer nie. Ek het vrede daarmee gemaak en besef dat hierdie maag deel gevorm het van ’n lyf wat baie hard en dapper teen die kanker geveg het … en dit kon oorwin.
Wat het my so hard laat terugveg teen die kanker? Die besef dat ek nog glad nie reg is vir doodgaan nie. My grootste vrees is dat ek voor my tyd sal gaan. Daar is te veel drome wat nog bewaarheid moet word, te veel dinge wat ek wil aanpak. Dís wat my laat vasbyt het.
Ek hoef ook nie meer “perfek” te wees om gelukkig in my vel te voel nie …
Toe die dokter verduidelik hoe dit moontlik van een bors na die ander kan versprei, was die besluit eenvoudig: sny altwee af.
Sommer dadelik.
Mense vra dikwels of die dubbele mastektomie die moeilikste aspek van hierdie pad was.
Glad nie!
Dit was eintlik die heel maklikste. Die narkose, en die idee om vir ure lank “uit” te wees, was baie meer senutergend.
Met of sonder natuurlike borste, dit maak nie ’n verskil aan hoe ek oor myself voel nie.
