Die Here sal by jou wees. Die genade sal by julle wees!
(2 Timoteus 4:21-22)

Laat die klere maar oud wees, die speelgoed skraps, die kos op die bord basies, die spyskaart voorspelbaar, die mure jare laas geverf, die stoelbekleedsels verweer, die mat uitgetrap en die kastrolle vol duike en hopeloos verouderd volgens hedendaagse standaarde.

Vul so ’n omgewing met menslike genade – ’n gesindheid wat ook as liefdevolle goedheid omskryf kan word – en die verweerde ou stoel word ’n stukkie hemel, die mat latertyd se soet herinnering, die klere ’n terloopsheid.

Babas en kleuters het liefdevolle goedheid van hul ouers en sibbe nodig, so ook tieners van mekaar én hul gesinslede, huweliksmaats van mekaar, bejaardes van hul volwasse kinders en selfs hul onvolwasse kleinkinders. Niemand kan sonder liefde leef nie.

O, wat ’n God dien ons nie! Watter versekering van liefdevolle goedheid gee Hy nie deur sy Seun aan elkeen nie! So anders as die gode van die Ooste, die gode van antieke Egipte, die afgode van antieke Kanaän – ja, so anders as onsself as ons eie god – is Hy! Hy is liefde ...