Luister meer as wat jy praat

1599

Daar is ’n handleiding of aanwysings vir baie dinge, maar nie vir mense nie. Om met mense om te gaan is die saak waarmee ons die meeste sukkel, veral om regtig na hulle te luister.

Ons manier van luister laat veel te wense oor. Die meeste mense hoor nie regtig wat ander sê nie, want ons hoor net ons eie gedagtes. Ons moet oefen om te praat én om te luister, want dít is die vaardighede wat in ’n gesonde verhouding nodig is.

Probeer om die ander persoon se behoefte te hoor

Mense werk hard daaraan om hulle eie gedagtes oor te dra. In dié proses leer jy nie regtig wie die ander persoon is nie. Veral verkoopspersone raak so gefokus op die diens of produk wat hulle moet verkoop dat hulle heeltemal vergeet van die ander persoon en hulle behoeftes. Hulle moet eerder probeer agterkom wie die persoon is sodat hulle die kliënt kan oorreed om hulle produk of diens te koop.

Die meeste van ons is maar vrot met luister! Behalwe as die ander persoon begin met: “Ek mag jou nie eintlik vertel nie…” of: “Het jy gehoor…?” Dis waar. Moenie maak asof jy glad nie skinder nie, of eerder, nie luister as daar geskinder word nie! Maar behalwe daardie kere hoor ons maar sleg.

Daar is talle redes hiervoor, soos dat jou verstand baie meer woorde per minuut verwerk as wat iemand kan praat. Jou gedagtes begin dan om die “klankleegtes” te vul – dit gebeur sonder dat jy daaroor nadink. Voor jy jou kom kry, trek jy by jou tannie se skoonseun se pa, en is jou gedagtes nie meer by die persoon voor jou nie.

Vra die regte vrae en praat baie minder

’n Openbaring wat my hele lewe verander het, was om in plaas van om vir iemand te sê wat om te doen, eerder vrae te vra. As jy opdragte en bevele uitdeel, beteken dit die ander persoon is dan verantwoordelik vir wat volgende gaan gebeur, want jy het mos nou, byvoorbeeld, vir jou kind gesê om dit of dat te doen.

Kinders raak opstandig, want hulle wil nie heeltyd hoor wat hulle moet en nie moet doen nie. Daar is ’n konstante magspeletjie aan die gang tussen die ouers en kinders. Verander jou ouerskapstyl om wanneer daar niks fout is nie, by jou kind te gaan sit en toestemming te vra om vir hulle ʼn vraag te vra. Ek sê dan vir hulle ek wil hê hulle moet vir my sê in watse huis wil hulle grootword. Ek gee hulle natuurlik twee opsies: in ’n huis waar almal heeltyd baklei of een waar almal in ’n span saamwerk en waar almal mekaar respekteer. Hulle antwoord, en ek luister net. As jy jou kinders reg wil opvoed, leer die vaardigheid aan om vrae te vra. Die regte vraag gaan die antwoorde bring wat jy wil hoor op grond van jou leiding.

Oefen daardie geselsies en fokus jou aandag

Maak oogkontak wanneer jy met iemand praat. Jou oë wys waarop jy fokus. As jy ’n boek lees, ’n fliek kyk of besig is met ’n projek, kyk jy mos na dit waarmee jy besig is, want dit is waarop jy fokus. As jy wegkyk, is jou aandag elders.

Sodra jy oogkontak verbreek omdat jou aandag afgelei word, lyk dit asof jy nie meer luister nie. Dis maklik om weg te kyk as jou selfoon piep of die hond blaf. Wanneer jy dan praat, gebruik jou woorde om te wys dat jy wel geluister het. Moenie sinies en sarkasties wees nie. Deel jou hart opreg en met deernis deur die woorde wat jy sê.

Wanneer jy êrens moet wag, knoop ’n geselsie met iemand aan, soos in die tou by die bank of terwyl jy by die pizza-plek wag. Die truuk is jy moet soveel moontlik luister. By ’n geselligheid kan jy byvoorbeeld na die vrou toe stap wat almal vermy omdat sy nie ophou praat nie. Vra haar uit en luister so lank as wat jy kan.

Dis goed om te luister, want almal weet minstens een ding wat jy nie weet nie.

Jannie Putter, mentor en motiveringspreker

Kliek hier vir meer videos en artikels deur Jannie.