Bedaar en erken dat Ek God is, hoog bo die nasies, hoog bo die aarde. (Psalm 46:11) 

Ek het my twee oudste dogters eenmaal verloor in ’n winkelsentrum toe hulle nog baie klein was. Dit was ’n absolute nagmerrie toe ek besef dat hulle weg is. Ek het soos ’n mal mens rondgehardloop en hul name geskree tot groot geskinder en gegiggel van die mense. Ná wat gevoel het soos ure, het ek hulle ’n hele ent verder weg gekry.

Plat op die boude, daar sit die twee toe. Ek het lanklaas in my lewe so buite beheer en benoud gevoel. Net toe ek wil raas en vra hoekom hulle doodluiters plat op die grond sit, sê die oudste: “Mamma het nog altyd gesê ons moet plat gaan sit as ons verdwaal het en nie weet waar om Mamma te kry nie. Mamma het mos belowe Mamma sal ons altyd kom soek en ons kry!”

In verligte trane het ek daardie dag iets van God geleer. Ons hardloop soms benoud rond as ons verdwaal voel in ons lewenspad. Ons soek antwoorde op al die verkeerde plekke en wil ons eie koppe volg. Maar God het sy oog op ons. Hy weet presies waar ons is.

Daarom is dit goed as ons in moeilike tye kan stil raak en voor Hom gaan sit. Ons koppe wil die antwoord self uitwerk, maar Hy ontmoet ons op die plek waar ons is. Hy kom haal ons en bring ons by veilige plekke. Ons soek in ons benoudheid die antwoord, en dít terwyl Hy die antwoord ís. Ons soek die uitkoms, maar vergeet: As dinge baie buite beheer is, is Hy ons veilige vesting.

Vandag herinner ek jou graag dat al daardie beloftes in sy Woord waar is!