Ons almal wil graag selfversekerd wees, maar dit is nie altyd so maklik nie. Vind maniere om onnodige spanning uit jou lewe te verwyder, dink positief oor jouself en kyk hoe jou selfvertroue groei. 

Baie mense sukkel met selfvertroue. Om jou selfvertroue na vore te bring én te gebruik, moet jy begin deur voorbereid te wees.  

Voorbereiding lyk verskillend vir almal. Maar soms beteken dit bloot om aandag te gee aan iets wat jou pla. Sodra jy voorbereid is, weet jy jy kan ontspan.  

Jy het ook integriteit nodig. Jy wil eerlik wees oor wie jy is. Wanneer jy voorgee, is daar so baie waaraan jy moet voldoen. Dan volg die een leuen op die ander. Later weet jy self nie meer wat die waarheid is en wat nie. Daar sal ’n groot gewig van jou skouers af wees as jy ophou daarmee. 

Besluit of jy wel selfversekerd wíl wees. Die oomblik wat jy besluit het jy wil, beteken dit jy moet jou daartoe verbind. En as jy eers daai verbintenis gemaak het, moet jy elke keer as die geleentheid hom voordoen selfvertroue kies.