Geld en finansiële sukses behoort nie jou maatstaf vir geluk te wees nie. Kyk eerder binne jouself om te ontdek wat regtig belangrik is.
Mense sê graag dat hulle die beste prokureur, dokter of rekenmeester wil wees. Dat hulle ander wil dien en hulle roeping wil vervul. Heimlik droom hulle egter daarvan om baie geld te maak, want hulle koppel sukses aan rykdom en geluk.
Geen wonder baie kinders maak hulle loopbaankeuses op grond hiervan nie. Hulle luister as die grootmense gesels en glo later self dat baie geld vir hulle die goeie dinge in die lewe sal kan koop.
Almal smag na ’n beter lewe
Dit is belangrik om nie te veel of te min van jouself te dink nie. Minderwaardigheid of meerderwaardigheid sal net onnodige pyn, hartseer en ongelukkigheid veroorsaak.
Die waarde van ’n besigheid sal mos nie ’n korrekte weerspieëling van sy bates en laste wees as die finansiële state of rekeningkundige beginsels verkeerd is nie. Net so kan die verkeerde manier van dink en die verkeerde waardes jou eiewaarde verwring en nie wys wat jy regtig werd is nie.
As ’n mens nie besef dat jou lewe kosbaar is nie, sal jy jou onttrek en vir alles bang wees. Jy sal bekommerd wees dat mense jou sal verstoot. Of jy sal gedurig met ander wedywer om beter oor jouself te voel en ’n vals gevoel van sekuriteit te ervaar. Gevoelens van ontnugtering, mislukking, waardeloosheid, hopeloosheid, wanhoop en leegheid is dan jou voorland.
Sodra jy egter weet wat jy regtig werd is, sal jy by geluk en vrede uitkom. Jy sal ’n doelgerigte en vervulde lewe lei waarin jy die fyner dinge kan geniet en deur ’n nuwe bril na alles rondom jou sal kyk. Dan kan jy in vrede met God, jouself en ander mense leef en sal jy besef dat daar vir jou ook ’n plekkie in die son is.
Jou lewe sal nie meer bestaan uit vlietende oomblikke van opwinding en uitgelatenheid wat afhang van vertonings, prestasies of goedkeuring nie. Jy sal positief dink en voel oor jouself en jouself waardeer vir wat en wie jy ís, nie vir wat jy kan dóén nie.
Sukses gaan oor lewenskwaliteit, nie prestasies nie
Mense is vir ’n te lang tyd gebreinspoel om te glo dat “sukses” as “$UK$E$” gespel word. Baie geld mag die gevolg wees, maar nie noodwendig nie. Sukses word ook nie noodwendig gemeet aan ’n toekenning, diploma of sertifikaat nie.
Miskien gebruik jy nog altyd die verkeerde standaarde en evalueer jy jou lewe onbewustelik in terme van rand en sent. Dit veroorsaak dat jy dinge liefhet en mense gebruik, in plaas van om dinge te gebruik en mense lief te hê!
As jy weet wat jy regtig werd is, sal sukses nie meer jou doelwit wees nie. Dit sal eerder die gevolg wees nadat jy die basiese dinge bereik het wat regtig belangrik is.
Jy beleef vrede en ’n diepe innerlike harmonie
Elke mens het iets wat niemand ooit van hom of haar kan wegneem nie – ’n eiewaarde. As jy weet wat joune is, sal jy so bevry voel dat jy dit nie vir jouself sal wil hou nie. Jy sal die geheim met ander wil deel en selfs die verskuilde skatte in hulle ook wil ontdek.
Daar is wonderlike, suksesvolle mense wat nie noodwendig ryk sal doodgaan nie. Hulle is merkwaardig omdat ander in hulle voetspore wil volg bloot vir wie hulle is, nie vir wat hulle bereik het of besit nie. Mense wil graag naby hulle wees omdat hulle vreugde en geluk uitstraal.
Wat meer is, mense wat finansieel goed daaraan toe is, wil gewoonlik nie graag hulle rykdom met my en jou deel nie.
Maar dié wat hulleself meet aan hulle eiewaarde en nie aan hulle netto waarde nie, het een ding gemeen. Hulle deel hulle uitbundigheid en vreugde, hulle geheime en suksesse spontaan omdat hulle wil hê ander moet ook so gelukkig soos hulle wees.
Danie Vorster, GR (SA), is ’n praktiserende rekenmeester, ouditeur en leraar van die evangelie van Jesus Christus. Hy bied persoonlike finansiële bestuur vanuit ’n Bybelse oogpunt aan deur middel van boeke, praatjies en seminare.
