Hoe om… vir Hom te skyn

402

Die lewe maak soms onverwagte draaie en jou geloofsvlammetjie brand later flou. Jou lewe het egter steeds betekenis, ongeag jou omstandighede, sê LYNETTE BEER.

Kleintyd sing ons met oorgawe: “Hierdie klein liggie van my, ek sal hom laat skyn.” Namate jy ouer word, kom jy agter dis nie altyd maklik om jou liggie te laat skyn nie.

Mense maak jou seer. Die lewe maak jou wseer. En jy maak jouself seer deur die verkeerde keuses te maak. Jou vlammetjie brand só laag dat jy dink vergifnis is onmoontlik; God kan jou nie meer gebruik nie. Dit is egter net ’n gevoel, dis nie die waarheid nie.

Hy skryf jou nie af oor jou foute nie

Die Bybel vertel van geloofshelde wat ook verkeerde besluite geneem het, ook hulpeloos en hopeloos gevoel het. Partykeer was hulle mislukkings so groot dat God amper die reg gehad het om Sy rug vir hulle te draai.

Dit is egter allermins wat gebeur het. Vir Hom gaan dit oor verhoudings en verlossing. Jesaja sê dat Hy nooit ’n lamppit wat dof brand, sal uitdoof nie.

Gaan lees weer die verhaal van Dawid in 1 en 2 Samuel. Dit ly geen twyfel dat hy een van belangrikste figure die Bybel is nie. Hy word in amper die helfte van die boeke genoem!

Ek word geïnspireer deur die onverskrokkenheid en waagmoed waarmee hy Goliat aanvat, die leeu vermorsel en die beer verskeur. Sy kosbare vriendskap met Jonatan, sy psalms van lof en sy geduld met die bose koning Saul beïndruk my.

Dit is ook Dawid wie se lewe op ’n stadium teen ’n steil afdraand ontspoor toe hy meer as die helfte van die gebooie op een slag oortree. Hy pleeg egbreuk met Uriase vrou, Batseba, lieg vir Uria, steel in werklikheid van hom en laat hom later vermoor.

Glo dat jou liggie nooit uitgedoof sal word nie

Die profeet Natan konfronteer Dawid. Wanneer Dawid en Batseba se seuntjie siek word, vas Dawid met ware berou en bid vir genade. Hy word vergewe, maar meer nog, Hy kan met sy Vader se hulp sy lewe weer op die regte spoor plaas. Hy kan weer sy volk lei, lofliedere sing en ’n verskil maak.

Verkeerde keuses en besluite sal nooit die laaste sê hê nie, mits ek met ware berou my foute erken en bely. Ek weet belydenis gaan my nie teen die gevolge van my dade vrywaar nie, maar ek kry die kans om ’n nuwe pad met Hom te begin stap.

In Romeine 8 vers 28 staan daar: “Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is.” Selfs jou foute kan ’n positiewe nadraai hê.

Maak tyd vir rus voor jy weer die pad stap

Gaan lees die verhaal van Elia in 1 Konings 19. Hier sien ons ’n profeet wat veronderstel was om ’n onwankelbare geloof te hê, maar wat nou emosioneel en liggaamlik afgemat die woestyn invlug en wil sterf.

God gee vir Elia kos en laat hom toe om te rus. Hy antwoord hom in ’n sagte stem en verseker hom dat hy nie alleen is nie. Soos ek ’n kersvlam wat wil doodgaan, met my hand beskerm tot waar ek die lig nodig het, só vou die Vader Sy hand om my.

Op pad na my bestemming sal my vlammetjie flikker, want die wind dreig om my liggie te oorweldig. Maar Hy hou sy hand om my flikkerende liggie totdat ek my bestemming bereik. En ek raak deel van Sy oorwinnaarsfakkel om ver en wyd te skyn.

Voel jy vandag oorweldig en ontspoor? Begin dan eers by die basiese dinge: Neem tyd om fisies, geestelik en emosioneel te herlaai. Wanneer jy jou kragte herwin het, kan jy weer die pad in geloof begin stap met jou hand in Syne.

Lynette Beer is bekende motiveringspreker, skrywer van Carpe Diem Media en teoloog. Sy is ’n baanbreker in persoonlike ontwikkeling en korporatiewe groei. Sy is hoof van die maatskappy Seeds of Inspiration, wat motiveringspraatjies, opleiding en berading lewer. Sy is ook medeeienaar van EQ4Kids, wat kinders se emosionele vaardighede help ontwikkel.