Almal jaag daarna, maar niemand kan dit vang nie. Tyd wag immers vir niemand nie. Leer jou kind vroeg reeds om tyd reg te bestee.
Soms wens ons die tyd om, soos wanneer jou pasgebore baba vir slapelose nagte sorg of jou tiener haar oë na bo opslaan en deure toeklap. Ander kere wens ons weer die tyd kan stilstaan as jy die klein lyfie styf teen jou vashou of sien hoe lekker die jongspan in die water baljaar in die vakansie.
Gebruik ’n uurglas terwyl jou kind sekere take verrig
Ons almal het net 24 uur in ’n dag. Hoe ons dit gebruik, is belangrik. Ook die Bybel vermaan ons om ons tyd slim te gebruik.
Tog is daar elke dag baie dinge wat ons aandag aflei of ons tyd onnodig in beslag neem – dinge wat ons weghou van dit wat werklik belangrik is. Om nou jou tyd verstandig te gebruik is tot jou voordeel, want niemand weet wat die dag van môre inhou nie. Dit is waarom jy jou kind vroeg moet leer dat tydsbestuur ’n vaardigheid is wat bemeester moet word. As jy goeie bestuur oor jou ure kan uitoefen, kan jy die meeste uit elke dag kry.
Kinders leer op ’n jong ouderdom die konsep van tyd wanneer jy byvoorbeeld klein takies gee wat binne ’n sekere tyd voltooi moet word. Gebruik ’n stophorlosie en kyk hoe vinnig kan jou kleinding sy klere aantrek. As hy sy tande borsel, kan jy hom vra om die sand in die uurglas dop te hou. Die tyd wat dit die uurglas neem om leeg te loop, sal hom ’n begrip leer van hoe lank ’n minuut of vyf minute is.
Gebruik ’n roetinekaart om sy daaglikse doelwitte te bereik
Om op te staan, aan te trek, te eet en tande te borsel om betyds te wees vir skool leer jou kind hoe dit voel om ’n klomp take binne ʼn sekere tyd klaar te kry. So leer hulle mettertyd hoe vyf minute, 15 minute of ’n uur voel. Ons wil hê ons kinders moet weet dat as jy sê: “Ons moet oor vyf minute ry”, dit nie gaan werk om nou ’n nuwe speletjie uit te pak nie.
Roetine help ook baie. Dit gee struktuur aan ’n kind se dag en herinner hom aan wat gedoen moet word. Hy sal ook minder gejaag en gespanne voel as hy presies weet watter take wanneer gedoen moet word en hoeveel tyd hy aan elkeen moet bestee. Roetine help hom om verantwoordelikheid en selfstandigheid te ontwikkel.
’n Kalender of roetinekaart werk uitstekend om hierdie vaardigheid aan te leer. Maak byvoorbeeld ’n kalender waar elke kind ’n kleur kry wat verjaarsdae, vakansies en aktiwiteite aandui. Of gebruik plakkers om belangrike dinge soos toetse en sosiale verpligtings mee aan te dui. As hy die take vir die dag suksesvol afhandel, bou dit ook sy selfvertroue.
Om vooruit te beplan help hom sperdatums haal
Leer jou kind ook om groot take in kleiner dele te verdeel om so die tyd wat hulle elke dag beskikbaar het, te gebruik om die kleiner gedeeltes van ’n sekere taak af te handel. Die boekresensie wat vir Afrikaans geskryf moet word, moet byvoorbeeld eers oor ’n maand ingehandig word.
Help hom om te sien wat alles voor dan nog moet gebeur, van agter na voor: Die resensie moet geskryf word, die boek moet gelees word en die boek moet gekies word. Daarom kan hy nie wag tot die dag voor die sperdatum om die boek te kies nie. Die resensie gaan ’n week neem om te skryf, die boek (afhangend van die dikte daarvan) gaan drie weke neem om klaar te lees en daarom is dit nodig om nou reeds, lank voor die sperdatum, die boek te kies waaroor daar geskryf gaan word.
Enige taak word deur sperdatums gedryf. As kinders kan leer om vooruit te beplan, verwerf hulle vaardighede wat hulle vir die res van hulle lewe sal gebruik om doelwitte te bereik.
Waak daarteen om jou kinders se dae te oorskeduleer. As daar van die een aktiwiteit na die ander gejaag word, leer hulle beslis nie effektiewe tydsbestuur nie. Maak tyd om te speel, te lees, stokperdjies te beoefen, en om mekaar en die lewe te geniet.
Lizanne du Plessis, ouerskapkenner
Kliek hier vir meer videos en artikels deur Lizanne.
