Rig jou gedagtes op Hom

407
Liesel Krause-Wiid

Wees versigtig wat jy dink, want dit kan fisies nadelig wees vir jou. Spreuke 27:19 sê: Soos jou gesig weerkaats in water, so wys iemand se hart wat in hom aangaan.

Jou onderbewuste kan nie onderskeitussen waar en onwaar nie. Met ander woorde, as jy negatiewe gedagtes dink, gaan hulle begin wortelskiet.

As jy lank genoeg op ’n bepaalde afbrekende manier dink, sal jou onderbewussyn dit begin glo. Daarom moet ons maak soos Paulus sê: Elke gedagte gevange neem en dit gehoorsaam maak aan God.

Laat jou breinvoetpaadjies in ’n positiewe rigting loop

Ons gedagtes vorm as’t ware “voetpaadjies” in ons brein. Wanneer ons pal aan iets dink, trap ons daardie voetpaadjies uit en raak dit al hoe moeiliker om ’n nuwe pad te vorm. Hierdie breinpaadjies is waar jou woorde gebore word en waaruit jou optrede voortspruit.

Kenners reken dat as jy jou slegs ’n paar minute lank bekommer, jou immuunsisteem sommer vir ’n paar uur daarna onderdruk word. ’n Studie is met ’n groep bejaarde mense gedoen. Hulle is aangesê om vir tien dae net te dink aan musiek en tydskrifartikels en hulle gunsteling-TV-programme van 30 jaar tevore. Die resultate het gewys dat hierdie persone se sig en geheue verbeter het, en hulle vingers langer geword het. Dis die effek van jou gedagtes op jou liggaam!

Vra jou voortdurend af of dit wat jy dink, ooreenstem met dit wat ons in die Woord leer. Hou op om oor dinge te dink wat jou moeg en mismoedig maak.

Iemand stuur nou die dag vir my ’n negatiewe epos, en daardie aand kan ek glad nie aan die slaap raak nie. Later besef ek: Maar wie is ek om so oor hierdie ding te dink? Ek moet eerder die heliumballon waaroor ek my so verknies, se tou afknip en kyk hoe die ballon in die niet verdwyn.

Dink gedurig aan alles wat mooi en goed is

Begin om ’n loflied te sing of haal een van jou gunstelingteksverse aan as jy agterkom jy dink negatiewe gedagtes. Ek het ’n vriendin wat ’n rekkie om haar arm dra. Elke keer as sy iets negatiefs dink, skiet sy haarself met die rekkie om haar te herinner om aan opbouende goed te dink.

Ek lees ’n ruk gelede dat ouers een positiewe ding op ’n dag vir hulle kinders sê en omtrent 18 negatiewe goed. Stel jou die enorme impak daarvan op hulle lewe voor… Kom ons raak eerder positief.

Paulus sê mooi in Filippense 4: Kom ons fokus op dit wat waar en edel en rein is. Dink aan alles wat mooi en prysenswaardig is. Rig julle gedagtes op Hom. Kom ons doen dit sodat ons God met ons gedagtes verheerlik. Moenie net jou hart gehoorsaam maak nie, doen dieselfde met jou kop.

Interessante navorsing is op pasiënte gedoen. Hulle het die woord “nee” vir ’n persoon geflits – en onmiddellik het daar ’n reaksie in die liggaam plaasgevind.

Breinskanderings het gewys die negatiewe woordjie het hulle taal, spraak en vermoë om nugter te dink, geaffekteer. Dit het hulle angstig en geïrriteerd gemaak.

Kies jou gedagtes versigtig, want alles begin in jou kop

As jy dinge gereeld genoeg vir jouself herhaal, sal jy dit begin glo, of dit nou waar is of nie. Die lewe is egter eenvoudig net te kort om pal negatief te wees! Bly weg van mense wat gedurig kla.

Breinkenners meen dat as jy vir 30 minute of meer ’n dag aan ander se gekla blootgestel word, dit jou brein se vermoë om probleme op te los kan aantas. Stel grense, en beskerm jouself hierteen.

Jou leefstyl kan ook die oorsaak wees waarom jy negatief dink. Slaap genoeg, eet gesond en oefen gereeld. Neem waar wat om jou aangaan – ruik die lug, voel die gras onder jou voete en bewonder ’n mooi blom.

Laat die Heilige Gees op die troon van jou lewe sit. Hy help jou om anders te dink en op te tree. Dit is moontlik om jou verstand te vernuwe! Vra Hom elke dag om jou te help om die mooie in die lewe raak te sien, ongeag wat om jou aangaan.

’n Gelukkige lewe begin in jou kop.

Liesel Krause-Wiid, predikant

Kliek hier vir meer videos en artikels van Liesel.