Elke paartjie kort ’n plan

1961

Paartjies wat trou, glo dat hulle nugter is oor wat voorlê. Tog is dit dikwels dieselfde mense wat later skei. ’n Strategiese plan is die oplossing.

Almal is dit eens: ’n Mens moet elke dag aan jou huwelik werk. As jy pasgetroudes egter vra hoe hulle dit gaan doen, weet hulle nie regtig nie.

Hoewel hulle op ’n rasionele vlak toegee dat ’n huwelik werk vra, voel dit op ’n emosionele vlak asof ’n definitiewe plan nie by ’n verhouding pas nie. As ons lief is vir mekaar, moet dit tog vanself werk, of hoe?

Die meeste egpare het geen idee hoe om die algemene beginsels vir ’n gelukkige huwelik prakties toe te pas nie.

Julle het verskillende idees oor ’n gelukkige huwelik

’n Mens wonder dikwels hoe paartjies se verwagtings van die huwelik lyk met ’n idilliese wittebrood agter die rug. Die meeste mense meen dis harde werk en nie net maanskyn en rose nie, maar glo hulle is reg vir die uitdaging.

As julle eers getroud is, tree daar ’n finaliteit in en besef jy jy moet te alle tye, deur alles, goed of sleg, saam werk en saam daardeur kom.

Die instandhouding is baie belangrik. Om ’n gesonde huwelik te bou vra spesifieke idees om die verhouding te diens. Dit gaan nie net daaroor of julle huis wil bou of kinders wil hê nie!

Navorsing oor langtermynhuwelike wys dat gelukkige paartjies duidelike verhoudingsdoelwitte en -strategieë het waarvolgens hulle die verhouding deur al die seisoene van ’n huwelik bou en herbou.

Stel ’n praktiese plan op vir julle verhouding

Kenners is dit eens dat paartjies wat saam droom en dink oor hulle verhouding, ’n groter kans staan om gelukkig getroud te bly.

Baie is egter teësinnig om dit te doen, aangesien hulle glo dat ’n huwelik nie soos ’n besigheid is nie. ’n Mens moet elke dag dinge hanteer soos dit na jou kant toe kom en nie volgens ’n vooropgestelde plan nie, glo hulle.

Tog kan dit goed wees, want dit herinner julle weer aan wat belangrik is. Elke verhouding is uniek, maar daar is tog sekere basiese beginsels wat altyd geld. Gesels rustig en maak ’n lysie van die dinge wat vir julle twee belangrik is.

Dit kan byvoorbeeld iets wees soos: Praat met mekaar oor alles (goed of sleg) en moet nooit dit wat jy op die hart het, opkrop tot môre nie. Of: Bly altyd mekaar se beste vriende, maar gun mekaar die nodige ruimte, want elke mens is uniek.

Om julle doelstellings swart op wit te sien is sinvol omdat dit julle weer bewus maak van die punte waarop julle moet konsentreer.

Die gevaar bestaan egter dat dié voornemens net mooi woorde op papier kan bly. Miskien kan julle die lysie sommer teen die yskas vassit sodat julle julleself elke dag daaraan kan herinner.

Hou julle nog by die oorspronklike plan?

’n Huweliksplan is beslis nie net bedoel vir pasgetroudes nie. ’n Mens kan nooit agteroor sit en laat begaan nie.

Na ’n aantal gelukkige jare besef baie paartjies dat hulle uitmekaar gedryf het. Hulle het nie meer gedeelde drome en doelwitte nie. Hy voel dalk jy is meer besorg oor die kinders as oor hom, terwyl jy meen jy speel tweede viool teenoor sy werk.

As julle dit byvoorbeeld voor die kinders se geboorte geniet het om saam muurbal te speel, begin weer daarmee. Een keer ’n week kan al ’n groot verskil maak. Laat hom dit in sy dagboek opskryf, terwyl jy ’n oppasser reël.

Probeer ook om een keer ’n maand die kinders by iemand te los en ’n date night te hê. En onderneem om hom te ondersteun en te verstaan as hy soms laat moet werk, in ruil vir ’n lekker lang vakansie.

Kyk hoe kreatief en prakties julle kan wees om weer nader aan mekaar te kom. Kort voor lank sal julle sien dat die band tussen julle verstewig het en is julle weer dolverlief!