Moet jy hom vashou of ruimte gee?

0
453
huwelik

Haat jy dit as jou man alleen sy eie ding wil doen? Of pla sy besitlikheid jou? Dalk lê die oplossing in sy ouerhuis.

Elke kind beleef sy of haar eie gesinslewe as normaal. Dis tog al wat ’n mens van kleins af ken. Die dag as julle trou, verwag jy dus onbewustelik dat die nuwe gesin dieselfde sal lyk.

Jou ouerhuis het ’n invloed op jou eie huwelik

In sy ouerhuis was daar dalk ruimte om homself te wees en sy gang te gaan. Dit was dalk nooit nodig om verslag te doen oor waar hy was en wat hy gedoen het nie. Hulle gesin het miskien selde hulle gevoel vir mekaar gewys. Of dit was nie belangrik om as gesin dinge saam te doen nie.

In julle huis het dit miskien heeltemal anders gewerk. Pa en Ma het moontlik gesorg dat die gesin ’n hegte eenheid was – al was dit dan ook met streng reëls. Met vakansies moes die gesinslede die meeste dinge saam doen. Enigiets wat die kinders op hulle eie wou doen, moes hulle spesifiek toestemming voor kry en agterna deeglik verslag oor doen.

Julle is dalk selde toegelaat om self besluite te neem en die gevolge daarvan te dra. Vir ander mense was dit wonderlik dat julle so lojaal teenoor mekaar kon wees en emosioneel so na aan mekaar was.

Elke party se verwagtings oor die huwelik skep probleme

Jou man wil dalk meer gaan visvang, jag en kuier saam met sy vriende. Elke keer wat hy daarop aandring, voel dit vir jou asof hy nie meer omgee nie. Jy het hom miskien al daarvan beskuldig dat ander mense vir hom belangriker is as jy.

Begin nou boonop eis dat hy verslag doen van waar hy was en wat hy gedoen het, nes dit in jóú ouerhuis gedoen is, en dis ’n wenresep vir ’n rusie. Hy sal voel jy wil hom beheer en dit as voorskriftelikheid en besitlikheid ervaar.

Aan die ander kant kan hy dalk weer verwag dat vroulief meer onafhanklik moet wees en haar eie keuses moet maak. Dit sal hom irriteer as daar altyd eers ’n lang gesprek moet wees om sy raad oor ’n besluit te vra.

Dit kan heeltemal onverstaanbaar wees: Gesamentlike besluite was dan nog altyd ’n bewys van julle eenheid! Sy “onverskilligheid” beteken dat hy nie regtig omgee nie en sommer selfsugtig is.

As die pienkvoete eers daar is, kan die probleem erger raak. Vir manlief sal dit normaal wees dat die kinders onafhanklik grootgemaak moet word. Dit sal hom glad nie pla as hulle kom en gaan soos hulle wil nie. Dit sal waarskynlik ook nie vir hom belangrik wees om elke sportgeleentheid of oueraand by te woon nie.

Vir jou sal sy optrede net een ding spel: afwesige pa. Jy sal aandring dat hy strenger moet wees, meer tyd saam met hulle moet deurbring en die verantwoordelikheid moet aanvaar as iets slegs met hulle gebeur.

Verstaan julle kinderjare en kry dan ’n beter plan

Paartjies dink gewoonlik hulle stamp koppe omdat hulle persoonlikhede verskil. Dit het wel ’n invloed, maar dis nie die enigste oorsaak van konflik nie.

Heel eerste moet julle mooi gaan dink oor hoe dinge in elkeen se ouerhuis gewerk het. Dit is veral belangrik om te weet of julle uit ’n vervlegte of onafhanklike gesin kom. Die effek wat dit van kleins af gehad het, sal grotendeels bepaal hoe jy oor jou eie huwelik voel.

Gesels oopkop daaroor. As jy weet hoe sy oorspronklike gesinsisteem gewerk het, is dit baie makliker om te verstaan wat sy verwagtings van die situasie is. Daardie kere wat hy op ’n “onverklaarbare” manier optree, sal miskien dan baie meer sin maak.

Besluit nou hoe dit in die toekoms anders kan werk. Daar sal positiewe eienskappe aan beide kante wees wat saamgevoeg kan word om ’n gebalanseerde gesinsisteem te bou. Verbind julle om regtig sáám te werk aan hierdie unieke plan. Beskou dit as ’n heerlike avontuur!