Was dit nie vir Sy genade nie, sou jou lewe baie anders gelyk het. In plaas van kla, tel eerder die seëninge waarvoor jy dankbaar is, sê MADELEIN RUST.

Wat jy het is uit genade ontvang van God

Dis amper asof ons die kuns van kla behoorlik bemeester het. Net vanoggend het ek ’n lysie klein jakkalsies vir my seun gestaan en aftel. Op my vingers.

Toe oorval ’n groot skaamte my. Sommige van die jakkalsies het die potensiaal gehad om aaklige gevolge te hê. God het egter Sy hand van bewaring oor ons gehou en ons beskerm teen enorme finansiële skade en selfs die dood.

Wat het jy wat jy nie uit genade ontvang het nie? Jou huis? Motor? Gesondheid? Die geld in jou bankrekening? Jou lewensmaat, kinders, talente, verstand, geleerdheid?

As ons ouer word, het die deursneemens gewoonlik iets om op trots te wees. Al het jy net jou kroos grootgekry tot op die punt dat hulle aangename mense is.

Maar hoeveel daarvan het jy self vermag?