Hartswonde is onsigbaar vir die wêreld. Genesing daarvan lê in die feit dat jy oorleef het, want jy kan kies om te begin leef, sê ALMARIE DU PREEZ.

Genesing van diep emosionele pyn is ’n uitdaging

Helder oordag ry ek rustig werk toe. Wat volgende gebeur, lyk soos ’n toneel uit ’n aksiefilm. Teen 120 km/h gly my kar, tol deur die lug en rol herhaaldelik voor dit op sy dak tot stilstand kom.

Te midde van geskokte omstanders se ongeloof klim ek in een stuk uit die wrak. ’n Piepklein litteken is al wat ek oorhou van daardie fratsongeluk.

“Julle sal vir my gips moet aansit, anders gaan die mense nooit glo wat gebeur het nie,” skerts ek met die dokter.

Kom ons wees nou maar eerlik. ’n Uiterlike wond met steke, verbande en kneusplekke lyk erger as onopsigtelike inwendige beserings.

Dit is net so met diep, emosionele pyn. Dit is onsigbaar vir ander. Daar is geen fisiese tekens nie. ’n Mens kan sê jy het seer ná ’n verbrokkelde huwelik, emosionele mishandeling of die dood van ...