Vergifnis is nie ’n gevoelsdaad nie

1697

Episode 8: Vergifnis is nie ’n gevoelsdaad nie

#3MinuteSelfhelp-REEKS met Lynette Beer

’n Mens maak talle onaangename gebeurtenisse in jou lewe bymekaar; dit kleef aan jou psige soos mossels aan ’n skip se bodem. Om daarvan ontslae te raak, moet jy elkeen wat jou ooit leed aangedoen het, vryspreek, ongeag wat hulle gedoen het.

Vee elkeen se rekord skoon. Moenie vashou aan die pynlike herinneringe nie. Vergewe – nie omdat jy so voel nie, want jy sal nooit so voel nie – buitendien, as ons slegs op ons gevoelens staatmaak, is ons in groot moeilikheid. Vergewe sodat jou gedagtes skoon en vry kan word.

Dit is aanvanklik nie ’n lekker of maklike ding om te doen nie. Jy is mos te na gekom. Maar ons kan nie altyd net doen wat ons wil nie. Ons het ’n verantwoordelikheid.

Dit geld ook vir vergifnis. En die resultaat is so wonderlik! Dit is ’n daad van selfbevryding. Jy doen dit altyd terwille van jouself, nooit terwille van ander nie.

Hoe weet jy dat jy iemand kwytgeskeld het? Wanneer jy daardie persoon sien en nie meer agter die naaste voetganger of winkel induik om nie gesien te word nie. Jy kry dit reg om hoflik te groet. Eers dán is jy op die wenpad.

As jy dit nog nie kan regkry nie, moenie moed opgee nie; dit verg nogal baie emosionele oefening en soms ’n bietjie gemoeds-fisio. Maar al is dit moeisaam en stadig, groei jy tog mettertyd weg van die negatiewe emosies.

Om foute te maak is menslik. Om te vergewe is goddelik.

–Lynette Beer, motiveringspreker

Kliek op voelgoed.co.za/3-minute-selfhelp vir Lynette se video- en oudioreeks.